Chhiatni/thatni kaihhruaina tihchhuah a ni

 Puipunna hmun-ah zaikhawm khap a ni

Mizoram Chief Secretary leh Mizoram State Disaster Management Authority-a State Executive Committee Chairman ni bawk chuan chhiatni/thatni puipunna hmun-a zawm tur thupek tichhuakin chhiatni/thatni puipunna hmunah reng reng zai/zaikhawm loh tur a ni tih a tarlang.

COVID-19 hripui leng mek laka mipuite an him zel theih nana Mizoram Chief Minister, State Disaster Management Authority-a Chairman ni bawk kaihhruaina hnuaia niminpiah-a Meeting chuan mipui punkhawmna chhiatni/thatni - mitthi vuina, lungphunna, inneihna, etc chu hri inkaidarhna hmunah a chang ang tih an hlauhthawn avang leh heng hmunte hi in chhuizui theih loh hri inkaidarhna hmun a nih mai loh nan inkaihhruaina siam belh tha an tih angin hemi ang hian nimin khan kaihhruaina thar hi tihchhuah a ni a a. He kaihhruaina thar tihchhuah ah hian a hma lama Order lo tihchhuah tawh angin mi 50 aia tam punkhawm khap tlat niin chhungkhat laina pawh a tlem thei ang ber kal thin nise, Association/pawl anga mitthi vuinaah mi 2 (pahnih) aia tam kal loh tur a ni tih a tarlang a. Mitthi vuina ah Social Distancing a awm theih nan Kohhran Hall emaw, YMA Hall emaw, Veng chhunga Hall zau tawk tak, hmun remchangah vuina hun hman tur a ni tih tarlangin, hemi atan hian mitthi lawina Kohhran leh a Veng neitu YMA ten ruahmanna an siam thin ang tih a tarlang bawk.

Hei bakah hian kaihhruaina thar ah hian Mitthi vuina Hall luhka zawng zawngah a lutte hming pum, Address leh Telephone number chhinchhiah tur niin Local/Village Level Task Force ten ruahmanna an siam anga, mi 50 aia tam chu luh tir loh tur a ni. Chhiatni/thatni puipunna hmunah reng reng zai/zaikhawm loh tur niin mitthi vuitu tur chu a theih hram chuan kum lama la upa lo leh mi hrisel pangngai a ni tur a ni tih a tarlang bawk. Mitthi vuinaah hian kum lama upate leh hrisel lohna benvawn neite kal loh tur niin Chhiatni/thatni ah mipui kalkawmten Face Mask an vuah vek tur a ni a. Mitthi vuina, lungphun, inneihna, Anniversary, pawl thila kalkhawmna, adt. ah a kal te hming ziahna Register chu YMA/LLTF/VLTF in an vawng theuh tur a ni a. Mitthi vuinaah hian thingpui leh a hmeh sem loh tur a ni tih a tarlang bawk.

Hemi chungchanga nimin-a Order tihchhuah takah hian COVID-19 hripui leng mekah Mizoram-ah pawh hri kai thar an pung zel tih tarlan niin thu leh awm hma chuan he thupek hi zawm tura mipuite hriattir an nih thu pawh tarlan a ni bawk.

Comments

Chhiar Hlawhte