Aadhaar-a harsatna thlen

Serchhip District Consumers Association (SDCA) hruaitute chuan tunlaia Serchhip a Aadhaar enrollment kalpui mek chungchangah thil fel tawklo a awm nia an hriat te District thuneitute an sawipui.

Serchhip District Consumers Association hruaitute hnen atanga thu kan dawn danin SDCA hruaitute hian niminpiah khan Serchhip DC Office-a Aadhaar Enrollment Officer Incharge, F. Lalnisai, SDC chu hmuin Aadhaar Card hi tunlaia document pawimawh tak a nih avangin sawrkar pawhin a ngai pawimawh a, chuvang chuan a thlalakna senso (New Enrollment) pawh sawrkar sum-a tih tur nih thu an sawi a, Central sawrkar in tunhnaia a thuchhuah a siam-ah pawh Aadhaar thlalakna man a thlawn anih tur thu hi a chuang tih sawiin, hetiang anih lai hian tun thlenga Serchhip DC Complex-a Aadhaar thlalakna ah New Enrollment pawh pawisa chawitir an ni thin tih mipui lam atangin complaint an dawng tih an sawi a, Addhaar Enrollment Fee hi mipui-a la tawhlo turin an ngen a ni.

Hei bakah hian Aadhaar siamthatna (Correction Fee) pawh sawrkarin chawi zat tura a ruahman anga mipui ten an chawi theih nan hma laksak turin an ngen a. SDC chuan Adhaar New Enrollment atana Fee lak anih chu a lo hriatpui loh thu leh a lo enfel tur thu a lo hrilh a ni.

Hei bakah hian Serchhip District Consumer Association hruaitute chuan Aadhaar thlalak chungchangah thingtlang mite leh Veng hla a awm te tana DC Office pankhawm vek chu tunlai COVID-19 hri leng boruakah chuan harsatna a awm thu sawiin, thlalak tum nileng-a intlar chunga thla la theilo te an awm thin ni awma sawi chu thalo an tih thu an sawi a. Hei vang hian Aadhaar Enrollment chu a tahtawla District chhung khaw thenkhata hun hran hrana neih anih theih nan leh Veng leh khaw bik te enrollment ni ruahmana felfai zawka enrollment neih anih theih nan hmala turin SDC hi an ngen bawk a, hei pawh hi lo enzui a tum thu a sawi bawk.