Serchhip District chhunga VC inthlanpui-a RO leh ARO turte tan Training neih a ni

Village Council inthlanpui neih tur atana Serchhip District chhunga Returning Officer leh Asst. Returning Officer tura ruat te tan nimin khan Serchhip DC’s Conference Hall-ah inthlanpui buatsaih dan tur chungchang zirhona neih a ni. Serchhip District chhunga VC inthlanpui neih tura Returning Officer leh Asst. Returning Officer tura ruat te tana Traning hi Serchhip District Election Officer, Kumar Abhishek chuan hmanpuiin VC Election fel fai kan neih theih nan Returning Officer leh Asst. Returning Officer te tha taka inbuatsaih a tul thu leh an mawhphurhna tha taka an hlen a pawimawh thu a sawi a. Chutianga an mawhphurhna te an hlen theih nana puih an ngaihna apiangah District Election Officer leh a thawhpuite an inpeih reng thu hrilhin, ‘The Mizoram Village Council Rules 2014’ hnuaiah VC Election thianghlim leh felfai taka kalpui anih theih nan duhsakna a hlan a ni.
He Training hi Serchhip Election Officer, Vanlalhmachhuana chuan kaihruaiin VC inthlan lo awm tur atana a fawng chelhtu tur Returning Officer leh Asst. Returning Officer te kohkhawm hmasak ber an nih thu leh inthlanna fel leh dik buatsaih tura District chhunga a tha ber ber nia an hriat te thlan an nih thu a sawi a, an chungah rinna an nghah thu sawiin, inthlanna felfai a awm theih nana theihtawp chhuah turin a chah bawk. Election Officer chuan VC inthlanpui neih hun tur puan a nih rualin Returning Officer te chu an hna a in tan nghal tih pawh sawiin, fimkhur taka hna thawk turin a chah bawk a ni.
Serchhip District chhunga Village Council 54-a inthlanna buaipui tur hian VC tinah Returning Officer leh Presiding Officer pakhat ve ve bakah Polling Officer pahnih (2) zel awm tura ruahman a ni a, hemi ang hian Returning Officer mi 54 bakah VC lian zual thenkhat ah anmahni puitu tur Asst. Returning Officer tur mi 5 ruat bawkin Reserved-ah midang pakhat ruat ni bawkin a vaiin Vawiin-a Training tur hian mi 59 koh an ni a. He hunah hian Master Trainer 3- Dorothy Muansangi, SDO (C), N. Vanlaiphai chuan inthlan laia RO te mawhphurhna leh vote chhiar dan tur chungchang zirtirin F. Lalnisai, SDC Serchhip chuan inthlan Nomination File dan tur te, Nomination File endik dan turte leh Symbol thlan dan te, Candidate turte tihfel leh Candidate tur list buatsaih dan chungchangte a zirtir a. Vanlalhmachhuana, Election Officer pawhin RO leh ARO te hriattur leh mawhphurhna hrang hrangte a zirtir bawk a ni.

Comments

Chhiar Hlawhte