Latest News

CCC tur buaipui mek zel

Serchhip-a Nursing School chu COVID Care Centre (CCC) atana hmang turin ngawrh taka buatsaih mek a ni. Tunhnaiah Mizoram-ah hri kai hmuh belh zel an nih avangin Mizoram sawrkar chuan Serchhip Lawibual ram-a Nursing School sak zawh tawh leh luah loha awm chu BSF Sipai zinga COVID-19 hri kai te enkawlna hmun, COVID Care Centre (CCC) atan hmang turin rua-hmanna a siam a, CCC atana buatsaih hna hi tunkar chhunga zofel hman tura tih a nih angin Thawh-tanni atang khan buaipui nghal a ni a, PHE Department chuan Chanmari Vengthar atanga Tui pekna tur siam hna thawk nghalin Vawiin lamah zawhfel hman an beisei thu an sawi a, Pipe Line an siam bakah hian Building chung sang-ah Tuizem lian zawk dahin Room tinah tui herh haw theihna tura siam an tum thu an sawi a, hri inkaichhawn theih laka tuisem te an him theihna turin ruahmanna an siam thu an sawi bawk.
Hetihlai hian P&E Department lam pawhin kawlphetha thlunluh hna tunah hian an thawk mek bawk a, a hma lamin Transformer thar bun turin ruahmanna siam lo ni tawh mah se sum senso a san dawn avangin tuna Chanmari Veng UPC Biak In bula Transformer atangin Line hi a thar thlung turin ruahmanna siam a ni leh ta zawk a, niminpiah lam khan Electric ban phunna tur ruahmanna siamin nimin khan a ban hi phun tan a ni a, Vawiin lamah a hrui thlun hna thawkin an zawhfel hman an beisei thu an sawi bawk.
Serchhip-a Nursing School building hi sak zawh a nih hnuah luah loha hun rei tak a awm tawh avangin thawmthat ngai a awm nual a, May 26, 2020 khan Health Department leh Chan-mari Branch YMA te chuan a thenfai hna hi thawkin hnatlang an lo nei tawh a. Nimin tlai khan Ser-chhip CMO, Dr. Laldawngliana Sailo leh DMS, Dr. ZD. Lalmuanawma leh thawktu dangte chuan helai hmun hi tlawhin a dinhmun an en a, Vawiin hian Health Department chuan hnatlang neiin a tihfel hna an thawk leh ang.

Comments

Popular News (Last 30 Days)