Mizoram COVID-19 hri kai 500 an chuang tawh

Mizoram-a COVID-19 hri kai hmuhchhuah chu mi za nga an tling ta a, darkar 24 kalta chhungin hri kai 19 hmuhchhuah niin hri kai hmuhchhuah zinga 267 chu enkawl dam an ni tawh bawk. Sawrkar thuchhuah tarlan danin niminpiah-a Sample enfiah te atangin nizan hmasa khan hri kai mi 13 hmuhchhuah niin heng te hi mipa 11 leh hmeichhia 2 te an ni a, Rapid Antigen Test (RAT) hmanga hri kai hmuhchhuah mi 12 awmin Rajiv Gandhi Stadium-a enfiahna atangin mi 10 hmuhchhuah an nih bakah Serchhip leh Lawngtlai atangin mi pakhat ve ve hmuhchhuah an ni bawk.
Hei bakah hian ZMC Laboratory-ah hri kai mipa pakhat hmuh-chhuah niin Hnahthial District mi a ni a, hun rei tak Hnahthial District atanga hri kai hmuhchhuah an awmloh hnuah Hnahthial District-ah pawh hri kai hmuhchhuah an awm ta a ni. Niminpiah-a hri kai hmuhchhuah zinga 5 te hi Assam Regiment niin midang 2 te chu Assam Rifles an ni a, Civil mi 6 an awm bawk a ni. Heng bakah hian Lunglei TrueNat Laboratory-ah Sample 27 enfiah niin heng atang hian hri kai mi 6 hmuhchhuah an ni leh bawk a, heng te hi BSF sipai Quarantine lai niin Bihar, Odisha, Jharkhand leh Uttar Pradesh atanga lo haw an ni.
Nimin thlenga Mizoram-a COVID-19 hri kai hmuhchhuah chu mi 501 an tling ta a, tunah hian hri kai zinga 282 chu enkawl dam ni tawhin hri kai enkawllai 219 an awm mek a. Nimin khan Lawngtlai-a hri kai enkawl mi pakhat chu CCC atanga chhuahtir niin Lunglei CCC atangin mi 4; Beraw CCC atangin mi 2 leh Zokhawsang Assam Rifles CCC atangin mi 9, an vaiin mi 16 te chhuahtir an ni.

India ramah mi nuai 12 chuang enkawl dam tawh :

Darkar 24 kalta chhungin India ramah COVID- hri kai 52,050 hmuhchhuah leh niin India rama hri kai enkawl dam pawh nuai 12 an chuang tawh thung. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 6,61,892 enfiah leh niin heng atang hian hri kai hmuchhuah 52,050 an awm leh a, heng te nen hian India rama hri kai hmuhchhuah chu 18,55,745 an tling tawh a ni. Darkar 24 kalta chhung khan hri kai zingah mi 44,306 te chu dam-ah puan niin India rama hri kai enkawl dam chu 12,30,509 an tling tawh thung a, hei hi hri kai hmuhchhuah atanga chhutin zaa 66.30 niin tunah hian hri kai enkawllai 5,86,298 an awm mek bawk a ni.
Hetihlai hian India rama hri kai hmuhchhuah zingah mi 803 te chuan darkar 24 kalta chhung khan nunna chan ve lehin India rama hri kai nunna chan chu 38,938 an tling tawh a, hei hi hri kai hmuhchhuah atanga chhutin zaa 2.09 an tling bawk a ni. India ramah hian tun thlengin Sample 2,08,64,750 zet enfiah a ni tawh bawk.

Comments

Chhiar Hlawhte