Serchhip-ah TrueNat Quattro RT-PCR bunfel niin a hmunhma pawh enfiah a ni tawh

Serchhip District Hospital-a COVID-19 test-na khawl bun tur chu bunfel a ni ta a, nimin khan sawrkar aiawh ten rawn enfiahin tunkar chhung hian hman theih beisei a ni.

Mizoram sawrkar in Serchhip District Hospital-a TrueNat Quattro RT-PCR (Mini RT-PCR) a bun tur hi Serchhip rawn thlenpui a nih hnuah tunkar hian Company lam atanga Engineer rawn kal ten a bunfel hna an thawk a, nimin khan heng khawl te hi hman theih tura bunfel niin nimin vek khan Mizoram sawrkar in a tirh he khawl bunna hmunhma enfiahtu- Dr. Krossnunpuii, Microbiologist leh K. Lalrinsanga, Sr. Lab. Tech te chuan an rawn enfiah a, ICMR in TrueNat Laboratory atana hmantlak tura tehna a siam hrang hrang hmanga enfiahin heng an enfiahna atang hian duhthu sam tawklo deuh te pawh bawk mah se heng te hi siamtha leh hlek hlekin pawm theih an beisei tih Dr. Krossnunpuii chuan a sawi a, an thil hmuh te chu Mizoram sawrkar-ah thehlutin sawrkar hian ICMR-ah a pawmna lehkha a thawn hnuah he khawl hi hman theih a nih tur thu a sawi a. Tunkar chhung pawh hian hman nghal theih mai an beisei tih a sawi bawk.

Tarlan tawh thin angin Mizoram sawrkar chuan Mizoram District tinah TrueNat Quattro RT-PCR (Mini RT-PCR) hi bun turin a ruahman a, a khawl zawng zawngte chuan District tin a thleng kim tawh a, he khawl hmang hian awlsam zawkin COVID-19 vei leh veilo enfiah theih a ni dawn a, TrueNat Quattro RT-PCR khawl hmang hian tumkhat-ah Sample 4 enfiah theih niin nikhat ah Sample 25-30 vel pawh enfiah theih a ni dawn a. Serchhip District Hospital-a he khawl enkawl tur hian Doctor pakhat leh Laboratory Technician pahnih (2) bakah Data Entry Operator pakhat (1) te chuan Lunglei-ah Training an nei tawh bawk a, niminpiah khan Trail Run an lo nei tawh bawk a ni.

Serchhip-a TrueNat Quattro RT-PCR (Mini RT-PCR) khawl bunna tur hian Laboratory awmsa chu hman theih a nih loh avangin District Hospital-a Room thenkhat chu siamrem a ni a, he khawl in a mamawh ang Room te chu siamrem fel niin nimin-a rawn enfiahtute chuan a tlangpui thu in Serchhip District Hospital inbuatsaihna chu tha an tih thu an sawi a. Serchhip District Hospital-a khawl te an enfiah hnu hian Mizoram chhimlam pan lehin Hnahthial, Siaha leh Lawngtlai District Hospital-a khawl bun te hi an enfiah leh tur thu an sawi a. Serchhip-a TrueNat Quattro RT-PCR hi hman theih a nih hunah chuan Rapid Antigen Test (RAT) hmanga Sample enfiah te pawh Serchhip atangin result tihfel theih a nih tawh dawn thu a sawi bawk.