Mizoram-ah COVID-19 hri kai 14 hmuh belh an ni

Niminpiah khan Mizoram-ah COVID-19 hri kai mi 14 hmuh belh leh niin Mizoram-a hri kai hmuhchhuah zawng zawng chu 967 an tling tawh.

Niminpiah khan ZMC Laboratory-ah Swab Sample 710 zet enfiah leh niin heng atang hian COVID-19 hri kai mi 10 hmuhchhuah an ni a, Rapid Antigen Test 292 tih niin COVID-19 vei 4 hmuhchhuah a ni bawk. ZMC Laboratory-a Sample enfiah atanga hri kai hmuhchhuah te hi Aizawl District, Mamit District leh Serchhip District-a sample lakte niin, mipa 7 leh hmeichhia 3 an ni a, an vai hian Quarantine Facility a awm lai vek an ni.

Aizawl District-a COVID-19 vei hmuhchhuah tharte hi mipa 4 leh hmeichhia 1 niin kum 24 leh 46 inkar, Karnataka, West Bengal leh Goa atanga lo kirte niin, an zingah hian Travel History neilo BSF sipai pakhat a tel a. Mamit District-a COVID-19 vei hmuhchhuah tharte hi mipa pakhat leh hmeichhia 2 niin kum 26 leh 27 a upate niin, Assam leh West Bengal atanga lo kir an ni a. Serchhip District-a COVID-19 vei hmuhchhuah tharte hi mipa ve ve, kum 24 leh 34 a upa, Assam leh West Bengal atanga lo kirte an ni.

Niminpiah a Rapid Antigen Test hmanga hri kai hmuhchhuah thar zinga mi 3 te hi Kolasib District mi niin mipa vek leh Assam atanga rawn lut vek an ni a, midang pakhat hi Aizawl District mi niin Aizawl College Veng mi, Local Task Force member, zinchhuahna neilo leh tual-chhung-a kai a ni thung.

Nimin khan Mizoram-a hri kai enkawl mi 9 te chu enkawl dam niin anmahni enkawlna hmun atanga chhuahtir an ni a, heti hian nimin thleng khan Mizoram-ah hri kai hmuhchhuah 967 awmin an zinga mi 473 te chu enkawl dam an ni tawh a, enkawllai mi 494 an la awm mek bawk a ni.

India-ah hri kai nuai 32 tling :

India rama COVID-19 hri kai hmuhchhuah chu nuai 32 an tling ta a, hetihlai hian hri kai enkawl dam pawh nuai 24 an tling tawh bawk. Ministry of Health & Family Welfare chhin-chhiahna atanga a lan danin darkar 24 kalta chhung khan India ramah Sample 8,23,992 enfiah leh niin heng atang hian hri kai 67,151 hmuh leh an ni a, heti hian India ramah Sample 3,76,51,512 enfiah ni tawhin hri kai 32,34,474 hmuh an ni tawh a, Sample enfiah zawng zawng atanga chhutin hri kai hmuhchhuah hi zaa 8.59 an ni. 

Darkar 24 kalta chhung khan hri kai zinga 63,173 te chu enkawl dam niin tun thlenga hri kai enkawl dam chu 24,67,758 an tling tawh a, hei hi za zela chhutin 76.29 an tling tawh bawk a, tunah hian hri kai enkawllai 7,07,267 an la awm mek bawk a ni. India rama COVID-19 hri kai zingah hian nunna chan pawh awm belh zelin darkar 24 kalta chhung khan mi 1,059 zetin nunna an chan leh a, tun thlenga hri kai zinga nunna chan hi 59,449 an tling tawh bawk a ni.