Hri kai mi 2 hmuh belh an ni

Nizan hmasa khan Serchhip District atangin COVID-19 hri kai mi pahnih hmuh belh leh an ni.

Serchhip CMO Office atanga thu kan dawn danin niminpiah khan Serchhip atang hian RT-PCR hmanga Sample enfiah tur 46 leh Rapid Antigen Test (RAT) 4, a vaiin Sample 50 thawn niin heng atang hian COVID-19 hri kai mi 2 hmuh leh an ni a, hri kai hmuhchhuah te hi mipa ve ve niin State pawn atanga Mizoram-a rawn lut ve ve an ni. Hri kai hmuhchhuah zinga pakhat hi kum 34-a upa Assam Regiment niin tun thla ni 15 khan Assam atanga Serchhip rawn thlengin Tourist Lodge, Khawtetlang-ah khunghran nghal a ni a, Rapid Antigen Test hmanga enfiahna ah Negative ni mah se RT-PCR hmanga Sample enfiah a nih leh hnuah COVID-19 hri a kai tih hmuhchhuah niin taksa-a natna lanchhuahna la neilo a ni bawk.

Hri kai hmuhchhuah pakhat hi Thenzawl Tourist Lodge-a khunghran mek niin kum 24 mi, Company hnuaia thawk niin tun thla ni 17 khan West Bengal atangin Mizoram-ah a rawn lut a, ani pawh hi Rapid Antigen Test hmanga enfiah tawh leh hri kailo ni mah se RT-PCR hmanga enfiah a nih hnuah hri a kai tih hmuhchhuah leh a ni a, a taksa ah natna lanchhuahna neilo a ni bawk. Serchhip District-ah hian hri kai mi 15 hmuhchhuah an ni tawh a, an zinga mi 7 te chu enkawl dam ni tawhin tunah hian hri kai enkawl-lai mi 8 an la awm mek bawk a ni.

Serchhip District-a hri kai enkawllai mek erawh mi 78 an la awm mek thung a, nimin khan Nursing School CCC-a hri kai enkawl BSF Sipai pakhat chu enkawl dam a nih hnuah chhuah-tir niin nimin vek khan Thenzawl AYUSH Hospital CCC-a hri kai enkawl dam pakhat chhuahtir a ni bawk. Nimin khan Serchhip Tarpi tlang-a DCHC-ah mi 2 dahluh thar niin mi 8 enkawl mek an ni a, Nursing School-a CCC-ah mi 22 enkawl mek niin Thenzawl AYUSH Hospital CCC-ah mi 48 enkawl mek an ni bawk.

Comments

Chhiar Hlawhte