Lengpui-ah MNF Sawrkar Flagship Programme SEDP tlangzarhna Dr. K. Beichhua hovin neih a ni

MNF Sawrkar Flagship programme, Socio Economic Development Programme (SEDP) chu nimin khan AH&Vety Minister, Dr. K. Beichhua chuan Lengpui Sericulture Department Eri Seed Farm-ah a tlangzarh. Nimin a SEDP tlangzarhna hunah hian AH&Vety Minister chuan natna hri-leng avangin ei leh bar-a Mizoram intodelhlohna a lang chiang hle tih sawiin, India ram State dangah hrikai an pungbelh zel si a, hnathawk thei an awm loh palh chuan Mizoram hi natna lakah him mah ila ei leh barah kan buai tho ang tih a hlauhawm tih a sawi a, hemi avang hian intodelh tura hmalak chu Chief Minister, Zoramthanga kaihhruai sawrkar chuan a ngai pawimawh hle tih a sawi bawk.
Dr. K. Beichhua chuan Chief Minister, Zoramthanga kaihhruai sawrkar chuan AH & Vety Line Department atan SEDP-ah kum 2019-2020 Financial Year atan cheng nuai 1860 a ruahman tih pawh sawiin, kumin March thla atanga kalpui tan tum ni mahse COVID-19 hri leng Lockdown avanga kalpui theih a nih loh thu leh tunah an kalpui tan theih tur thu a sawi a. SEDP hnuaiah AH&Vety Department atangin Pilot Project atan beneficiary mi 1020-te thlanchhuah tawh an ni tih a sawi bawk.
Ruahman lawk ang chuan AH&Vety Department hnuaiah hian Vawkpui Vulh mi 20 leh Vawk vulh mi 200-te hnenah tanpuina hi cheng nuai thum theuh pek an ni anga. Ar Vulh turin Broiler-ah chhungkaw 400 leh Rainbow Rooster-ah chhungkaw 400-te hnenah tanpuina pekchhuah tura ruahman fel tawh niin chhungkaw khatah Rs. 1,50,000/- zela pek an ni ang.
Sericulture Department kaltlangin SEDP hi Mamit District-ah Project based-in Mamit Aspirational District-ah nikum, 2019 khan kalpui tan a nih tawh tih Dr. K. Beichhua chuan a sawi bawk a, nikum March thla khan beneficiary 200-te hnenah tanpuina pek tan niin, a vaiin beneficiary 500-te hnenah kumin hian Pangang khawi tanpuina pekchhuah tum a nih thu leh Beneficiary pakhat zelah hian Rs. 140,896/- zel pek an ni a. Fisheries Department kaltlangin SEDP atan State sawrkar chuan cheng nuai 420.53 a ruahman bawk a, hemi atang hian Sangha khawitute hnenah subsidy-in Sangha chi semchhuah mek a nih bakah Pilot Project atan cheng nuai 57 sengin Chakai Farm buatsaih mek a ni bawk.

Comments

Chhiar Hlawhte