Latest News

Sawmbik ten Independence Day hmang dawn

Tun thla ni 15-a India Independence Day lo thleng tur chu Serchhip-ah chuan sawmbik mi tlemte te nen hman a ni dawn.

Serchhip DC Office atanga thu kan dawn danin tunkar Inrinni a India Independence Day lo thleng tur hi COVID-19 hri leng mek avangin kumdanga hman thin dan anga hman theih a ni dawn lova, he Ni pual hian Serchhip DC Office tual-ah khuallian tura ruat Home Minister, Lalchamliana chuan chawhma dar 11:00-ah India Hnam puanzar a pawt parh anga, Guard of Honour lain thuchah a sawi anga, kumdanga thildang tih thin te ti lovin kumin hian hri leng avanga Community Quarantine Centre atana an hmunhma te hman tirtu Kohhran leh pawl dangte hnenah 'Chief Minister Letter of Appreciation' hlan an ni anga, Beti Bachao Beti Padaho (BBBP) hmalakna in HSLC Exam result chhuakta a Serchhip District a Hmeichhe zirlai titha zual 10 te hnenah chawimawina thuziak leh pawisafai hlan an ni bawk ang.

Kumin a India Independence Day lawmna ah hian GAD thuchhuak angin zirlai naupang te chu an tel phal a ni dawn lova, Sawrkar Department hrang hranga Head of Offices te chauh tel tura sawm an ni dawn a, he hun hi mipui tam zawk ten an thlir theihna turin TV kaltlangin Live Telecast tum a ni bawk. He ni pual hian sawm bikte tan 'VIP at Home' chu chhun dar 12:00-ah DC chenna, Khawtetlang-ah neih a ni bawk ang. Serchhip-a Independence Day lawmna tur hmunhma hi nimin khan District Bawrhsap, Kumar Abhishek hova enfiah a ni a, Vawiin chawhnu lamah Reharsal neih tura ruahmanna siam a ni bawk.

Comments

Popular News (Last 30 Days)