Serchhip District-a VC Seat 240 chuh turin mi 741 te Nomination Paper pawm a ni

Serchhip District chhunga Village Council inthlanna neih tura chuh tuma hming pelut mi 741 awmin MNF Party chu Candidate ngah ber an ni dawn niin a lang a, Party hrang hrangte zingah Seat awm zawng zawng chuh kim tur an awmlo niin a lang.

Serchhip DC Office Election Branch atanga thu kan dawn danin Serchhip District chhunga Village Council 54-a inthlanna neih tura chuh tumte tana hming pekluh hun hi niminpiah tlai dar 3:00-a khar a nih hnuah heng inthlanna chuh tumte Nomination Paper hi Returning Officer te kaihhruaina hnuaiah enfiah nghal a ni a, inthlanna chuh tumte tana hming pelut mi 741 te Nomination Paper chu pawm a ni a, heng mite tan hian Vawiin tlai dar 3:00 thlengin inhnuhdawhna hun hawn leh a ni anga, chumi hnuah Candidate tur zat hi tihchian a ni anga, he inthlanna chuh tumte hnenah hian an chhinchhiahna (Symbol) tur semchhuah nghal a ni ang.

Serchhip District chhunga VC 54-ah hian Seat 240 a awm dawn a, heng te hi General Seat 178 leh Hmeichhia te tana hauh bik Seat 62 niin General-a Seat 178 chuh tur hian Nomination paper pawm 545 awmin Reserved Seat 62 chuh tur hian Nomination paper 196 pawm a ni a, an vaiin Nomination paper pawm hi 741 an ni.

Election Branch atanga thu kan dawn danin Party mal-ah MNF Party chu Seat chuh hnem ber niin General-ah Candidate 175 leh Reserved Seat-ah Canddiate 65 an nei a, heta tanga a lan danin MNF hian General-a Seat 3 an chuhloh laiin Reserved Seat-ah Candidate 3 in an siam tam thung a ni.

Congress Party (INC) in General Seat-ah Candidate 162 leh Reserved Seat-ah 61, a vaiin Candidate 223 an nei a, ZPM chuan General Seat-ah Candidate 153 leh Reserves Seat-ah Candidate 52 neiin a vaiin Candidate 205 an nei a. BJP chuan General Seat-ah Candidate 19 leh Reserved Seat-ah Candidate 6, a vaiin Candidate 25 an nei a, Independent-ah ding tur General Seat-ah 36 leh Reserved Seat-ah 12, an vaiin 48 an awm bawk a ni.

Comments

Chhiar Hlawhte