Ruling leh Opposition VC inthlauhna nasa tak awm thin a kiang thei dawn niin sawi

Serchhip bialtu MLA, Lalduhoma chuan Finance Commission chuan Village Council (VC) tan a hranpa in development sum hman tur a ruahman tawh tih sawiin, hei hian Ruling VC leh Opposition VC inthlauhna nasa tak awm thin te kha nasa takin a ti kiang thei dawn niin a sawi.

Serchhip bialtu MLA, Lalduhoma hian tunkar Thawhlehni atanga nimin thleng khan Serchhip bial chhunga khaw hrang hrang tlawhin Serchhip, Thenzawl, Buangpui leh Nehloh khua-a ZPM Candidate te a kawm a, heng VC Candidate hrang hrang a kawmna ah hian Lalduhoma chuan Village Council chu tunhma ang ni tawh lo tih sawiin, Finance Commission chuan VC tan a hranpa-in Development sum hman tura ruahman tawh a; hei hian Ruling VC leh Opposition VC inthlauhna nasa tak awm thin hrang hrang - Ruling VC nih avanga inlulinna te, thil ti thei bik an nihna changchawia induhsak bikna te, thleibik neihna te, Opposition VC nih avanga inrèp emaw te, engmah thawk thei lova development sum inhreksakna awm thin te kha nasa takin a ti kiang thei dawn tih sawiin, lawmawm a tih thu a sawi bawk.

Bialtu Lalduhoma chuan hetianga Ruling VC leh Opposition VC inthlauhna awm thin khan khawtlang hmasawnna tur leh mipui tana hamthatna awm tur tam tak a ti thuanawp thin chu thalo a tih thu leh a vei thin thu sawiin, “Vanneihthlak takin, Planning Commission Chairman chuan Village Council Level-a development sum chungchanga rawtna leh ruahmana siama thehlut turin min rawn be hlauh a, a lawmawm ka ti hle a ni. Chu rawtna ka thehluh vang chu a ni ang ka ti kher lo a; amaherawhchu, chung rawtna ka thlente anga hetia Finance Commission-in VC Level-a Development sum hman tur fel taka a rawn ruahman hian min ti lawm lehzual hle a ni,” a ti.

Serchhip Bialtu MLA Lalduhoma chuan nasa taka ZPM-in hma a sawn avangte, sawr-kar kal tawh leh kan hrawn lai mekah mipui lungawilohna leh kan ram leh hnam tana duhkhawp lohna a nasat tak em avangin kum 2023-a MLA inthlanpui lo lawm turah ZPM tan sawrkar siamna chance a san thu leh sawrkarna an siam ve ngei tawh pawhin a rin theih tih a sawi a. “Tuna kan VC thlantlin turte pawh hian, kum reilote ah ZPM sawrkar a hrawn mai dawn ni te pawhin a ngaihtuah theih a. Chuvangin, ZPM VC, kalphung thara ro rel tur kan thlan chhuah ngei pawh kan khawtlang tan a pawimawhin a tha hle dawn a ni,” a ti bawk.