RO in sawrkar lai Party Vote turin a ngen - MPYCC

Mizoram Pradesh Youth Congress Committee (MPYCC) chuan Village Council inthlanpui neih tura Khawzawl-V, Darngawn Veng Returning Officer (RO) Lalzuiliana Ralte chuan mipuite chu sawrkar lai party Vote turin a ngen niin an sawi.

Nimin-a thuchhuah an siamah MPYCC chuan August ni 27, 2020-a Mizoram puma Village Council/Local Council inthlan lo awm turah Khawzawl V, Darngawn Veng Returning Officer (RO) Lalzuiliana Ralte chuan Khawzawl District Implementation Demand Committee-a Secretary a nihna anga thuchhuah an siamah Khawzawl mipuite chu lawmthu sawi nana sawrkar lai party vote turin a ngen nia sawiin, hei hi August 12, 2020 khan chanchinbu-ah tihchhuah a nih thu an sawi a. Democracy ram lian ber India ram pumahah inthlanna felfai leh thianghlim neih chu kan lungphum innghahna a nih thu sawiin, chutihlaiin inthlan buaipuitu berin hetianga Sawrkar lai party Vote tura ngenna a siam mai chu a diko hle niin an sawi a, Democracy diriam tumna leh suasamna tenawm ber a ni tih an sawi a. Hetianga thuchhuah mak tak siamtute hian an thuchhuah siam sutna hi tichhuak leh tura an ngen thu leh hmalakna a awm loh chuan Dan anga hma la tura ke pen an inpeih reng thu an sawi bawk.

Hei bakah hian MPYCC chuan nimin (August 13, 2020) zing khan Aizawl South-III bialtu MLA, F. Lalnunmawia chuan a bial chhung Phulpui khuaa VC a campaign-na ah Phulpui khua chu 'Model Village' ah a puang niin an sawi a, hei hi inthlan inkaihhruaina dan, State Election Commission-in a siam Model Code of Conduct bawhchhiatna a nih thu pawh sawiin, thuneitute chu hma la thuai tura an ngen thu an sawi bawk.

Comments

Chhiar Hlawhte