Mizoram-a hri kai zingah zaa 52.85 enkawl dam

Mizoram-ah niminpiah khan COVID-19 hri kai pakhat hmuhchhuah leh niin heng te nen hian hri kai hmuhchhuah 649 an tling tawh.

Mizoram sawrkar thuchhuah tarlan danin niminpiah khan ZMC Laboratory-ah Swab Sample 82 enfiah niin hri kai hmuhchhuah an awm lova, Lunglei Civil Hospital-a Truenat Laboratory-ah Sample 25 enfiah ni bawkin hri kai hmuhchhuah an awmlo bawk a. Hetihlai hian Rapid Antigen Test atangin COVID-19 hri kai hmuhchhuah pakhat a awm thung a, hei hi Champhai District-a hmuhchhuah niin hnamdang, kum 24-a upa leh Assam atanga lo kal niin Symtom neilo a ni a, hri a kai tih hmuhchhuah a nih hnu hian CCC-ah dahluh nghal a ni bawk.

Heti hian nimin thleng khan Mizoram-ah COVID-19 hri kai hmuhchhuah 649 an awm tawh a, heng zinga mi 343 te chu enkawl dam ni tawhin hei hi hri kai hmuhchhuah atanga chhutin zaa 52.85 a ni a, nimin khan mi 13 enkawl dam niin tunah hian hri kai enkawllai 306 an awm mek a ni. Tun dinhmuna hri kai enkawl zinga tam ber te hi Aizawl District mi niin mi 204 enkawl mek an ni.

India-a COVID-19 hri kai in nuai 24 tling dawn hnai :

India ramah COVID-19 hri kai hmuhchhuah chu nuai 24 an tling dawn hnai tawh a, darkar 24 kalta chhung khan hri kai 66,999 zet hmuhchhuah leh an ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 8,30,391 enfiah leh niin heng atang hian hri kai 66,999 zet hmuh leh an ni a, heng te nen hian hri kai hmuhchhuah hi 23,96,637 an tling tawh a, nimin thleng khan Sample 2,68,45,688 enfiah ni tawhin sample enfiah atanga zaa 8.92 te chuan hri an kai a ni.

Hetihlai hian hri kai enkawl dam pawh pung ve zelin darkar 24 kalta chhung khan mi 56,383 enkawl dam niin hri kai enkawl dam chu 16,95,982 an tling tawh a, hri kai hmuhchhuah atanga zaa 70.76 ni tawhin hri kai enkawllai 6,53,622 an la awm thung a ni. India ramah hian darkar 24 kalta chhung khan hri kai zingah nunna chan 942 awm lehin heng te nen hian hri kai zinga nunna chan chu 47,033 an tling tawh bawk a ni.