Chanchin thar thenkhat :

 Khuahkhirhna siam belh

Mizoram State Election Commission chuan Mizoram-a Village Council leh Local Council in-thlanna neih tura thuchhuah alo siam tawh chu siam chhunzawm lehin Mizoram-ah COVID-19 vei an lo pun  zel avangin COVID-19 darh loh nana fimkhur thuah heng inthlan Campaign chungchangah khuahkhirhna (restriction) a siam a. Election Campaign-ah candidate leh a zuitu midang pahnih aia tamlo te tan ‘House to House’ Campaign phal niin mimal Compound leh Inchhunga luh phalna erawh chu In neitute thu a ni thung ang.

Task Force hruaitu thlak

Mizoram chhunga Village/Local Council inthlan puan a nih tak avang leh Model Code of Conduct hman a nih tak avangin Health & Family Welfare Department chuan Village/Local Level Task Force on COVID-19 chu ti dang-lamin Chairman atan YMA/YLA/MTP/YCA Branch te ruat an ni a, Vice Chairman-ah MUP/LUP Unit President dah niin YMA/YLA/MTP/YCA Branch Secretary te chu Member Secretary an ni dawn a, Member-ah YMA/YLA/MTP/YCA Branch Office Bearer mi 2; MHIP/MCHP/LWA/Chakma Mahila President; Kohhran (Denomination), veng chhunga Biak In nei chin atangin aiawh pakhat theuh leh Medical Personnel (Doctor/Nurse/Health Worker/ASHA) te an ni anga, Sept. 7, 2020 thleng hman tur a ni ang.

Oil phur tan leh dawn ta

Mizoram Oil Tankers Driver Association leh Mizoram Tankers Owners Union Joint Meeting chuan kar hmasa lam khan inhrilh hriatna hmasa awm lovin kawng chhe siam avanga Sethawn leh Thingdawl inkara Driver leh Handyman te chu an tan hnuah COVID-19 avangin kharkhip zui an ni ta tih sawiin, kawng lakah rei tak tih khawtlai an nih thu leh ei leh in tur takngial pawh nei lovin zan 4 dawn dah an ni tih an sawi a, hetiang hi thleng nawn tawhlo tura an duh thu an sawi a. Heng bakah harsatna dang avanga Tanker te Oil phur tura an kal ngamloh reng thu sawiin, SDO (Civil), Vairengte leh Vairengte Police te zarah ruahmanna felfai tak siam sak an nih takah chuan nimin tlai dar 4:00 atang khan Oil phur tura an tlan chhunzawm leh tak thu an sawi bawk.

CM hnenah ngenna thlen

Mizoram-a Autonomous District Council pathum-a hruaitute, Political party aiawh leh tlawm-ngai pawl aiawhte thukhawm chuan tun thla ni 11-a Mizoram sawrkar in Order of Precedence a tihchhuah ah District Council hruaitute telh an ni lo chu hriatthiam har an tih thu sawiin, siamtha leh turin Chief Minister chu an ngen bawk.

RAT Test neih sak an ni

Nimin khan Champhai khawpui chhunga Sumdawng Wholesaler/Distributor leh Mutia/porter-te chu Champhai CMO Office kal-tlangin Rapid Antigen Test (RAT) tihsak an ni a, he hunah hian Champhai khawpui chhunga Sumdawng Wholesaler/distributor mi 20, Mutia/porter mi 17 te bakah Frontline Worker 2, an vaiin mi 39 te Swab Sample lain Rapid Antigen Test tihsak an ni a, an result a negative vek a ni. Nitin mamawh bungrua phur lirthei enkawltute pawh enfiah leh tur an ni ang.