QC-a awm te Vote thlak dan tur ngaihtuah

Naktuk-a Village Council inthlanpui nei turah Quarantine Centre-a awm ten Postal Ballot hmanga Vote an thlak theih nan State Election Commission hnenah rawtna thlen tum a ni.

Nimin chawhma lam khan Health Directorate Conference Hall-ah Health & Family Welfare Board Vice Chairman, Dr. ZR. Thiamsanga hovin Quarantine Centre-a awm mek ten vote an thlak ve theih dan tur sawiho niin State Election Commission-in hemi chungchanga rawtna thlen tura a tih angin Quarantine Centre-a awm COVID-19 RT-PCR test result negative ten VC/LC Election-a vote an thlak theih dan turte sawiho a ni a, Quarantine Centre-a awmte hi COVID-19 Incubation Period, ni 14 awm tura tih an ni a, hetihlai hian RT-PCR result-ah False Negative 100 zelah 30 a awm theih avangin negative te pawh hi an Quarantine Period a la zawhloh chuan an him ngei a ni tih sawi fak theih a ni lova. Chuvangin Quarantine Centre-a awm zawng zawngte chuan Postal Ballot hmanga vote an thlak theih nan State Election Commission hnenah rawtna thlen nghal nise an ti a, nimin vek khan lehkha hi buatsaih nghal tura tih a ni.