Mizo hmeichhe laka mawilo taka che Sipai ten Mizoram an chhuahsan an phut tih MZP in an sawi

Mizo Zirlai Pawl (MZP) General Hqrs. chuan tunhnaia Champhai District chhunga Mizo hmeichhe pahnih laka Assam Rifles Sipai te chet dan chu Mizo Hnam hmuhsitna leh diriamna ah an ngaih tih an sawi a. Hetiang titute hi hremna na tak pek bakah Mizoram chhuahsan tura an phut thu an sawi bawk.

MZP General Hqrs. hian nimin khan Aizawl-a MZP Pisa-ah Executive Meeting neiin tun thla ni 15 tlai dar 4:00 vela Champhai District chhung Sesih khuaa Mizo hmeichhia pahnih (2) te laka Assam Rifles duty ten Mizo nula zahlo leh thamlo taka sum hmanga lei theih anga ngaia, sum nena an thlem hnuah hmeichhe zahawmna tihbawrhban tuma an chetna chu Mizo hnam hmuhsitna leh diriamna ah an ngai tih an sawi a. Hetianga titu hi hremna na tak pek anih bakah Mizoram chhuahsan tura an phut thu an sawi bawk. MZP chuan tunhnaia Assam Rifles ten Mizoram chhunga cheng, a ram neitute tithlabar leh buaina siamtute thlavang hauh zawnga tawng leh hmala thin Mizo zingah an awm pawh an dem takzet tih sawiin, Hnam thinlung pu-a mahni hamthatna chiah ngaihtuah lo turin an hriattir a. Union Home Minister, Union Home Secretary leh Lt. General Anil Chauhan, General Officer, Commanding-in-chief Eastern Command hnehah Assam Rifles chetna hi an thlen dawn tih an sawi bawk.

Hetihlai hian Brig. Vinod S, DIG 23 Sector Assam Rifles chuan Mizote rilru an lo tina palh anih chuan ngaidam a dil thu a sawi tih Mizo Students’ Union (MSU) chuan thuchhuah siamin an tarlang a. MSU thuchhuah chuan 23 Sector Assam Rifles-a DIG, Brig. Vinod S hian niminpiah tlai khan MSU General Hqrs. hruaitute chu Assam Rifles Hqrs. Aizawl-a leng-ah sawmin heta an inkawmna ah hian Brig. Vinod S chuan Mizo mipui rilru tihnat an duhloh thu leh Social Media-a thu a darh vak mai chu tha a tih loh thu sawiin, Mizote rilru an lo tina palh anih chuan ngaidam a dil thu a sawi tih an tarlang bawk.

MSU thuchhuah tarlan danin Brig. Vinod S chuan Mizote tan a inhawn thu leh harsatna hrang hrang chinfelna kawngah a inpeih reng thu sawiin, Assam Rifle mi leh sa Mizo mipui laka pawisawi an awm anih a, finfiah a nih phawt chuan a na thei ang bera hrem an nih tur thu a sawi a, COVID-19 hrileng dona kawngah Mizo mipuite himnan Mizoram sawrkar nena thawhho zel a duh thu a sawi bawk a ni.