Police kut atanga tlanchhuak man leh a ni

Naupang kumtlinglo laka hursualna kaih-hnawiha Thenzawl Police ten an man leh hemi hnua tlanchhuak chu nizan hmasa khan Police ten man lehin Serchhip Police Station-ah rawn lak a ni.

Thudawn danin kar kalta Thawhlehni khan Thenzawl Venghlun-a cheng kum 40 mi, Lalduhzuala chu mipa naupang lakah hursualna kaihhnawih ah mawilo taka a khawsak avangin Thenzawl Police ten an man a, Thenzawl Police te hian tihtur tul ang ang an buaipui hnuah Nilaini (Aug. 5, 2020) khan Serchhip-ah rawn phurhchhoh a ni a, Sesah lui bula an chuanna Motor leh Motor lian an inpelh lai, lirthei tlan-muan laiin a kut phurhna (Handcuff) nen a tlanchhuak a, a bibo zui ta a ni.

Hetianga an mi man a tlanchhuah avang hian Thenzawl leh Serchhip Police te chuan ngawrh taka chhui zui nghalin niminpiah khan Thenzawl leh Serchhip Police Station-a thawktute bakah Traffic Police leh SP Office-a thawktute chuan Serchhip Addl. DC, PC. Laltanpuia beihpui thlakin hma an la leh a, nizan hmasa dar 12:00 pelh hnu khan Serchhip leh Thenzawl inkar, Mat lui hnar lama a Thlam-a a riak chu nangchingin an man ta a ni. Nizan hmasa a an manna lai hi Serchhip ram lam niin Thenzawl ram lam atanga kal ngai a ni thung. Lalduhzuala hi POCSO Act hnuaia thubuai siam sak a nih tawh bakah a tlan-chhuah avang hian Serchhip Police Station-ah thubuai siam sak leh a ni bawk.