Mizoram Lok Sabha MP hovin Serchhip District-a Bank te hnathawh dan thlirlet a ni

Serchhip District Consultative Committee/District Level Review Committee & District Level Security Committee on Bank te chu nimin khan Serchhip-ah District Bawrhsap, Kumar Abhishek hovin an thukhawm a, he hun hi Lok Sabha MP, C. Lalrosanga pawhin a rawn hmanpui a ni.

Serchhip DC Meeting Hall-a he thutkhawm ah hian Lok Sabha MP, C. Lalrosanga chuan tunhma sawiin COVID-19 hripui avangin mi tam takin an eizawnna hna an chan a, State pawn atangin mi tam tak an rawn haw a, hun pangngaia bungrua leh hmanrua tluang taka kan hmuh thinte kan hmu tha tawklo bawk a. Ei leh bar zawn kawngah nasa takin min nghawng tih a sawi a. COVID-19 avanga hna chan leh eizawnna lama harsatna tawkte chhanchhuah an nih theih nan Bank ten thil tam tak an tih theih avangin thahnem ngai taka thawk turin he huna tel te chu a ngen a. Sawrkar laipui pawhin hei hi a ngai pawimawh hle tih sawiin, Ministry of Micro, Small & Medium Enterprises (MSME) kaihhnawih ruahmanna thar engemawzat a siam phah thu leh chu chu Serchhip District-a Bank te hnathawh dan thlirhona huna a rawn tel chhan a nih thu a sawi bawk.

He hun kaihruaitu District Bawrhsap, Kumar Abhishek pawhin Banking lama hmasawnna tur kan la neih- inzar zau chungchang te, Financial Literacy Campaign lam te leh Bank hote himna (security) lam thil te chu tunhma aia ngai pawhmawh zual turin Bank hotute chu a ngen a. Mizoram chu lehkhathiam tamna State anih avangin Online Banking lam uar deuh deuh tura inzirtir a that a rin thu a sawi bawk.

He hunah hian Member Secretary, Lalnilawmi, Chief Manager (Lead Bank) kaihhruaina in District chhunga Bank hrang hrang ten kumin March thla thlenga hmasawnna an neihte thlirlet a ni a, March 30, 2020-ah Credit Deposit Ratio (Bank a sum deposit atanga an puk chhuah tir zat ratio) chu 42.24% a ni a, Annual Credit Plan hnuaia loan puk tir zat chu 39.60% a ni. Annual Credit Plan hnuaia puk chhuah tirte hi eizawnna Agriculture, Industry leh Services Sector lama hmasawnna tura sum pukchhuah tir a ni a. KCC loan hi Financial Year 2019-20 ah mi 129 pek an ni a, a pawisa pekchhuah zat hi cheng nuai 122.14 a ni. Serchhip District-a KCC Loan pek tawh zawng zawng zat chu mi 1349 niin cheng nuai 928.79 pekchhuah a ni a. District chhunga Bank Branch awmlohna khuaah Business Correspondents te dah an ni hlawm a, Indian Postal Payment Bank (IPPB) te pawh hman an ni bawk tih he hunah hian tarlan a ni.

Heng bakah hian Bank kaltlanga sawrkar laipui Schemes hrang hrang kalpui mek dinhmun te, mipuite leh Bank inkara harsatna awm thei te sawiho niin hmalak zel dan turte pawh sawiho a ni a, he Meeting-ah hian Serchhip SP, R. Sathiyasundaram IPS leh SDO (Sadar), C. Lalduhzuali bakah District chhunga Bank Managers te, NABARD aiawh te, RSETI aiawhte leh District Officers pawimawhte an tel a ni.

Comments

Chhiar Hlawhte