Nausen thihna zirchianna nei

Mizoram-a nau piang kum khat hnuailam thihna leh nu nau chunga thihna chhan hrang hrangte zirchianna neih a nih hnu a sawihona hmasa ber chu niminpiah khan neih a ni. He sawihona hun Health & Family Welfare Department-a Principal Director Officer-a neih hi Dr. F.Lallianhlira, Principal Director chuan kaihruaiin Dr. John Zohmingthanga, Principal Investigator leh Dr. Zorinsangi, Public Health Specialist Co-Investigator te chuan he zirchianna an neih dan tlangpui leh an thil hmuhchhuah te an sawi a ni.
He zirbingna in a hmuhchhuah tlangpui ah chuan nausen thla khat hnuailam thihna chhan tam ber chu thla kim lova pian avanga harsatna in a tlakbuak leh thisen-a infection awm (Neonatal Sepsis) avang te niin, thla khat leh kum khat inkarah erawh chuan Pneumonia chu an thih chhan tam ber a ni a. Heng kum khat hnuailam thihna hi a tam zawk chu an pian atanga darkar 24 chhungin a thleng thin a ni. Naupang kum khat hnuailam thihna hi nu in nau a hrin vawikhatna te, hringtu nu in Thisen sang emaw Zunthlum emaw a vei avang te, Sahdah hmuam, Kuhva ei ching leh Zu in thin an nihin a thleng duh bik a ni.
Zirchianna atanga a lan danin nau chunga thihna tam ber chu nau neih zawha thi put vang niin, chung nau chunga thi hmun thuma thena hmun khat chu In lama nau nei te niin, za a sawmli (40%) chauhin an naupai laiin doctor hnen atangin naupai check up an ti a ni.
He zirbingna hi Directorate of Health Services hmalakna niin, Research Team-ah hian Doctor pasarih, Research Scholars-te leh Research Assistants 13 an awm a, Mizoram khaw 190 an tlawh chhuak a, Study Participant 1315 awmin, kum khat hnuailam naupang thi 343 leh nu, nau chunga thi 17 te chu zirbing niin, naupang kum khat hnuailam dam tha lai 955 te nen khaikhin an ni.

Comments

Chhiar Hlawhte