VC leh LC inthlan kaihhruaina tihchhuah a ni

Mizoram State Election Commission chuan Village Council leh Local Council inthlanpui neih tur chungchangah hriattirna tichhuakin inkaihhruaina tur a siam. Mizoram State Election Commissioner chuan inthlanpui neih tur chungchangah hian hriattirna tichhuakin India ram Democracy innghahna lungphum te zinga pawimawh tak pakhat, Village Council leh Local Council Inthlanpui pawh hripui COVID-19 vanga a hun takah neih theih a nih tawh loh hnuah, hripui ti darhlo leh inkaichhawng lo tura fimkhur tak chunga inthlanpui nei turin ruahmanna siam a ni tih a tarlang a. He ruahmanna siam ang chuan inthlan Campaign chungchangah Public Meeting emaw, mipui pungkhawm zawnga programme huaihawt emaw phal ni lovin District Magistrate in Section 144 of CrPC tlawhchhana mi panga (5) aia tam punkhawm a khap chu khauh tak a zawm tur a ni a. Inthlan chuh tura hming pekluh leh Nomination Paper enfiahna ah Physical Distancing (ft. 6-a inhlat) chu zawm ngei tur a nih bakah Mask vuah ngei tur a ni dawn a, Nomination thehlut tur an awmin Room chhungah mi 5 aia tam luh khap niin thutna pawh ft. 6-a inhlat-a thut tur niin Hand Sanitizer hman ngei tur a ni ang.

Inthlan Vote thlak ni-ah Polling Station leh a chhehvel ah engtiklai pawhin Physical Distancing (ft. 6-a inhlat) chu zawm reng tur niin tumkhat ah mi 50 aia tam punkhawm loh tur a ni a, NGO/MPF/Security/Medical Duty te pawhin Physical Distancing dan zawmin an duty tur a ni. Polling Station leh a chhehvel ah Chil chhak phal ni lovin, khuh dawn pawhin rawmawl hmanga Hmui hup ngei ngei tur a ni a. Polling Station leh a chhehvel a awm reng rengin Mask vuah ngei bawk tur a ni. Vote thlakna hmun (Polling Booth)-ah luhna leh chhuahna fel taka siam tur niin luhna ah hian hming ziahna chhawpin Vote thlak tur reng rengin Hming leh Mobile Phone No. an ziah zel a tul dawn a, Polling Officials te, Candidate te leh Election/Polling Agent zawng zawng te pawhin Mask an vuah bakah englai pawhin Physical Distancing an zawm reng tur a ni a. Vote thlak tur reng rengin Polling Booth an luh dawnah Hand Sanitiser hmangin Mask vuah ngei tur a ni a, Mask vuahlo tan Vote thlak theih a ni lovang.

Vote chhiar hunah pawh Vote chhiar tura ruat ten Physical Distancing dan zawm chungin Vote an chhiar anga, Candidate leh an Agent te pawhin Physical Distancing zawm chung zelin Vote chhiarna ah hian an awm thei anga, Mask vuah ngei tur a ni ang. Sawrkar thupek angin zan dar 8:30 atanga zing dar 4:30 thleng Curfew a nih avangin Election Officials, Candidate leh mawhphurhna bik neilo te chu Counting Hall leh a chhehvelah zan dar 8:30 hnuah tumah an awm phal a ni dawn lova. Inthlan Result hi peihfel a nih hnuah a tul chuan aurinna a puan a ni ang.