MNF in Congress nen an thawhhona an hrelo

MNF Party chuan Village Council inthlanpui neih turah Congress nen an thawhhona awm khua leh Veng an hriatloh thu sawiin, Zo Peoples' Movement Legislature Party Leader, Lalduhoma chuan a hrilh theih chuan an lawm hle ang tih an sawi.

Nimin-a thuchhuah an siamah MNF Party chuan Zo Peoples' Movement Legislature Party Leader, Lalduhoma chuan thuthar lakhawmtute a kawmna ah VC inthlan lo awm turah MNF Party chu Congress nen khaw pahnihah an thawhho thu a sawi nia tarlangin, “Pu Duhoma hian khawi hmunah te nge MNF leh Congress hi an thawhho han sawi chiang law law se a lawmawm ngawt ang,” an ti a. “MNF chuan theih chin chinah kan inzawt kim thawkhat viau a, chuti chung pawhin he VC inthlan turah hian Congress nena kan thawhhona awm khua leh veng kan hre lo a ni. Pu Duhawma hian min hrilh theih chuan kan lawm hle ang,” an ti bawk.

MNF thuchhuah chuan VC inthlan lo awm turah hian ZPM chuan MP inthlana an lo thawhpui tawh Congress chu khaw 35-ah an thawhhopui leh nia tarlangin, hei mai hi ni lovin BJP duhlo ber nia insawi thin chungin khaw 2-ah BJP an thawhhopui bawk niin an tarlang a. “Party dang thawhpui tawh lo tura intiam fo ZPM-in Congress leh BJP an thawhhopui ta mai hian mipui mak tih leh dem a hlawh hle a. Hetiang a nih takah hian Pu Lalduhoma hian dawt lang leh mai tur hmangin MNF chu Congress thawhpuiah a puh ve ta mai niin a lang,” an ti bawk a. Hei bakah hian Lalduhoma’n ZPM Party-a nihna nei lo chunga ZPM Party Office Bearers hun a tawp tawh thu leh ‘hruaitu thar thlan chu Val Upa Council kutah’ tih vel a puang chiam mai chu mak an tih thu pawh an thuchhuah ah hian an tarlang bawk.