Union Minister hovin Video Conference Meeting nei

Niminpiah tlai khan Union Minister of Housing & Urban Affairs, Hardeep S. Puri hovin PM- SVANidhi chungchangah Video Conference Meeting chu neih a ni a, he hunah hian Mizoram atangin UD&PA Department changtu Deputy Chief Minister hovin UD&PA leh Home Department hotute Chief Secretary Video Conference Room atangin an lo tel a ni.

He Video Conference-ah hian Union Minister of Housing & Urban Affairs, Hardeep S. Puri chuan PM-SVANidhi chu khawlaia thilzuar leh inpho thin (Street Vendors) te hripui COVID-19 lengin an eizawnna nasa taka a nghawng avang leh inkharkhip anih hmaa an sum khawlte inkharkhip hun chhunga an dehral avanga eizawnna bul an tan leh theih nana Central sawrkar in July ni 25, 2020 atanga a kalpui a nih thu a sawi a. Street Vendor ten leirem an rah theihna tur Scheme kaltlang hian Working Capital Loan Rs. 10,000/- thleng pek tura duan a nih thu leh loan la tur tan Guarantor neih a ngaihloh thu sawiin, State lian zawk Maharastra, Uttar Pradesh, Bihar-ah mi tam takin intundin nan an hman thu a sawi bawk.

He hunah hian Deputy Chief Minister, Tawnluia chuan COVID-19 hripui len laia Union Minister in kawngkam-a thilzuar (Street Vendors) te tana Scheme pawimawh tak PM-SVANidhi chungchangah Video Conference kaltlanga Meeting a ko chu lawmawm a tih thu a sawi a. PM-SVANidhi hi Mizoram-ah hlawhtling tak hman a nih theih nan UD&PA Department chuan Survey uluk takin a neih thu sawiin, khawpui chhunga khawlaia thil zuarte leh inpho mi 2777 register an nih tawh thu leh Smart Certification pawh pek an nih tawh thu a sawi a. Heng mi 2777 zingah mi 334 ten PM-SVANidhi hnuaiah loan dil an awm thu leh mi 28 hnenah loan pek fel an nih tawh thu a sawi bawk.

Deputy Chief Minister chuan Mizoram chu hun reilote chhunga loan pek percentage sanna ber dawttu State a ni tih sawiin, India ram hmun thenkhatah Street Vendor ten harsatna an neih ang chu Mizoram-ah a awm ve loh thu leh hei hi Home Department te nena lungrual taka thawhhona a awm vang a ni tih Union Minister hnenah hian a sawi a. Mizoram-ah hlawhtling taka PM-SVANidhi Scheme kalpui a nih nan Mizoram sawrkar chuan hma a lak zel tur thu a sawi bawk.

Comments

Chhiar Hlawhte