Mizoram Police te Zu leh ruihhlo do kawngah an thawk tha hle - Home Minister

Home Minister, Lalchamliana chuan Mizoram Police te chu Zu leh ruihhlo do kawngah an thawk tha hle tih sawiin, kumin ah January atanga July thla thlengin Zu leh a kaihhnawih bakah ruihhlo thahnem tak manin kumin chhungin ruihhlo kaihhnawih ah mi 84 man an nih tawh thu a sawi bawk.

Inrinni kaltaa Serchhip-a India Independence Day lawmna ah Home Department changtu Minister, Lalchamliana hian Home Department hmalakna a sawina ah he thu hi a tarlang a, Home Minister chuan Mizoram Police te chuan kumin January atanga July thla chhungin tualchhung siam Zu litre 2940, BEDC litre 45, Sapzu um puitling 11 leh a chanve um 2 bakah Beer can 3 an man thu sawiin, heng te hi pawisa a chantir chuan Rs. 9,26,950/- hu vela chhut a nih thu a sawi a. Damdawi leh ruihhlo kaihhnawih thubuai 64 an chhuichhuah tawh chinah Heroin Kg. 3.940, Methamphetamine Kg. 509.960, Ganja Kg. 16.369 leh a dang neuh neuh man an neih thu sawiin, kumin a Police ten an man tawh hi Rs. 17,23,10,591/- hu vel a nih thu leh ruihhlo kaihhnawih ah hian mi 84 man an nih tawh thu a sawi a ni.

Home Minister chuan Fire & Services hnuaiah mamawhna avangin Aizawl-a ITI Veng leh Vairengte-ah Fire Sub-Station siam a nih thu pawh sawiin, thawktu nghet te leh Volunteer tlemte chhawrin mipui leh ram in a mamawh em avangin kalpui hram hram a nih thu a sawi a. Vairengte ami phei chu COVID-19 avanga Mizoram-a lirthei leh bungrua lo lo lut te lo ti thianghlimtu ah hman a nih thu a sawi a, Emergency Response Support System (ERSS) pawh nikum August thla khan hman tan a nih thu a sawi bawk.

Hei bakah hian Home Minister chuan October 18, 2019 khan Mizoram-a khualzin te himna tura thawk tur bik, Mizoram Tourist Police chu hna thawk thei tura din a ni tih sawiin, Pilot Project atan Aizawl, Champhai leh Serchhip te thlan a nih thu a sawi a. Hmeichhia te chunga hleilenna do turin Hmeichhe Police Station (All Women Police Station) chu Dec. 13, 2019 khan SP Aizawl Complex-ah hawn a nih thu leh kumin May 22 khan Cyber Crime Police Station hawngin Crime and Criminal Tracking & Networking System (CCTNS) hmangin thil ti sualtute awlsam zawka chhuichhuah an nih theihna tura chak taka hmalak reng a nih thu a sawi bawk.

Comments

Chhiar Hlawhte