Chanchin thar thenkhat :

 Hri kai 64 hmuh belh leh

Inrinni khan Mizoram-ah COVID-19 hri kai mi 64 zet hmuh leh an ni a, hei hi Mizoram-ah nikhat-a hri kai hmuhchhuah tam ber ni nia hriat a ni. Inrinni-a Mizoram-a hri kai hmuhchhuah thar te hi hnamdang mi 57 leh Mizo 7 niin hnam-dang zinga mi 40 te hi sipai an ni a, ZMC Laboratory-a Sample enfiah zingah hri kai 50 hmuh niin Aizawl District mi vek an ni a, naupang kum 7 leh kum 9 mi telin midang hi puitling an ni thung a, State pawn atanga rawn haw mi 48 leh hri kai hmuhchhuah tawh te atanga hri kai-chhawng mi 6 awmin heng mite hi khunghran lai nia tarlan an ni bawk. Hei bakah hian Inrinni khan Kolasib District-ah Rapid Antigen Test hmangin hri kai 14 hmuh niin State pawn mi vek, hnamdang lirthei enkawltute an ni bawk.

Heti hian Mizoram-a COVID-19 hri kai hmuhchhuah chu mi 777 an tling ta a, an zinga mi 371 te chu enkawl dam ni tawhin mi 406 te enkawl mek an ni a, State pawn lama enkawl tura thawnchhuah mi 2 an awm tawh bawk a ni.


Candidate 6926 awm dawn

Tun thla ni 27-a Village Council inthlanna neih turah Mizoram pumah Candidate 6926 an awm dawn a, heng zinga 1677 te chu hmeichhia te tana Seat hauh chuh tur an ni. Mizoram State Election Commission atanga thudawn thar berin a tarlan danin tun thla ni 27-a District 9-a Village Council inthlanna neih turah hian inhnuhdawhna hun hawn chhunga mi 155 an inhnuhdawh hnuah Candidate 6926 an awm dawn ta a, heng zinga 5249 te chu a duh apiang ten an chuh theih, General Seat chuh tur niin midang 1677 te chuan hmei-chhia te tana Seat hauh bik an chuh dawn thung a ni. Party mal-ah MNF chuan Seat 2438 an chuh dawn a, hei hi General Seat-ah 1816 leh hmei-chhia te tana seat hauh ah 622 an ni a, INC chuan Seat 2075 chuhin ZPM in Seat 1197 an chuh a, BJP in Seat 298 chuhin HPC in Seat 6 an chuh a, MPC leh NPP ten Seat 2 ve ve chuhin Independent Candidate 908 an awm bawk a ni.


Vety Deptt. in mipuite ngen

Mizoram sawrkar-a AH&Vety Department chuan Vawk pûl hri hlauhawm tak, African Swine Fever (ASF) chu Assam leh Arunachal Pradesh ah Vawk tam takin an thihpui mek laiin, tun thla ni 13 khan Meghalaya State-ah he hri hi a leng tih finfiah a ni leh tih thuchhuah siamin an tarlang a. Tunah hian Meghalaya District hrang hrangah tai darh mekin Vawk tam takin an thihpui tawh bawk nia tarlangin, he natna hi Vawk mai bakah Sanghal te pawhin an vei thei a, a enkawlna damdawi leh invenna (Vaccine) awm lo leh a vei zaa za in an thihpui theih natna a nih avangin Mizorama a lo luh loh nan Vawk, Vawksa rêp leh Vawksa atanga thilsiam reng reng lak luh khapna chu zawm turin mipuite an ngen bawk.


MPF ten thutkhawm nei

Mizoram People Forum (MPF), Board of Executive Committee chu Inrinni tlai khan Central YMA Committee Room-ah thukhawmin MPF leh Political Party-ten thawhhona thu-thlung-a an lo ziah tawh, House to House Campaign chu tihdanglam ngai ngai an ti lova. Hetih rual hian hripui leng avangin VC/LC huam-chhunga MPF Local Forum, Political Party leh LTF te inlungrualin House to House Campaign chu an lo siam rem an remti thung a. Inthlanna neih ni-a an hruaitu ten Polling Booth an tlawh thin pawh hrileng avangin neihloh nise an ti a, inthlanna neih ni-a mipuite himna tura hmalak dan tur hrang hrang duangin, Duty tur atan pawh kum naupang deuh inruat an rel bawk.

Comments

Chhiar Hlawhte