Serchhip-ah hri kai 2 hmu leh

Niminpiah khan Serchhip-ah COVID-19 hri kai mi 2 hmuhchhuah thar an ni a, heng mite hi Serchhip Tarpi tlang-a Dedicated COVID Health Centre (DCHC)-ah enkawl tura dahluh nghal an ni.

Thudawn danin Serchhip District-a hri kai hmuhchhuah thar mi 2 te hi Rapid Antigen Test hmanga enfiah atanga hri kai tih hmuh-chhuah an ni a, heng mite hian August 15 khan Assam atanga Serchhip rawn thlengin Sawrkar in inkhunghranna tur a siam-ah khunghran nghal an ni a, Pathianni khan an Sample enfiah a nih hnuah hri an kai tih hi hmuhchhuah a ni ta a ni. Heng mi te hi Assam Regiment Sipai, kum 23 leh 26-a upa niin an taksa ah hri kai lanchhuahna neilo leh insawiselna neilo niin an pahnih hian Tarpi Tlang SIRD hmun-a DCHC-ah dah nghal an ni.

Hetihlai hian tunhnaia Aizawl lam atanga Maxi Cab-a rawn haw pakhat chu Aizawl-a hri kai pakhat nen lo inkawmhnaihna an nei nia hriat a nih hnuah Inrinni khan khunghran nghal a ni a, Pathianni khan a Sample enfiah niin hri a kai lo tih finfiah a ni thung.