FREE DIRT VILLAGE

FREE DIRT VILLAGE

(Bawlhhlawh awmlohna khua)

- Ramtea 

Hmunsang khua a cheng leh seilian ka ni a. Tlang sang taka awm anih avangin a khaw hmingah pawh ‘Hmunsang’ tiin an lo phuah nghe nghe a ni. Tunhma chuan ranvulh te khuahkhirh anih loh avangin khawlai a tawp thei hle a, mi chengte pawh an hrisel lovin, damlo an tam hle thin. Kum 5 kalta atang khan khawtlang hruaitute leh mipui ten nasa taka hma lak a ni a, tunah chuan Bawlhhlawh awm lohna khua (Free Dirt Village) kan lo ni thei ta a ni.

Bawlhhlawh awmlohna khua kan nih theihna chhan hi thil tam tak a awm a, chung zinga pawimawh leh langsar deuh te chu hengte hi a ni.

1. Ran khuahkhirh chungchang : Ran khuahkhirh a nih theih nan khawtlang hruaitu VC leh YMA ten nasa takin hma an la a. Khawtlang mipui ten tha takin ruahmanna te chu zawm a ni a. Chhungtin ten ranvulhte khuahkhirh vek niin khawlaiah ranvulh tla chhuak pakhatmah a awm ta lova, hei hian khawfai nihna kawngah nasa takin hma min sawntir a ni.

2. Ek In chungchang : Chhungtin te Ek In nei vek turin nasa taka hmalak a ni a, Ek In khur nei zo lo te pawh khawtlang hnatlang in siamsak vek an ni. Tunah chuan Ek In neilo awmlohna Open Defecation Free village kan lo ni thei ta a ni.

3. Zun In chungchang : Khawtlang thianghlimna kawnga pawimawh em em mai chu kawtthler hmun remchang apianga Zun In neih hi a ni. Khawtlang hruaituten vengchhung hmun lunlai leh remchang lai apiangah vantlang Zun In hi siam a ni a, mipui ten an hmang tangkaiin veng faina leh thianghlimna kawngah nasa takin hma min sawntir a ni.

4. Bawlhhlawh bawm chungchang : Bawlhhlawh bawm hi hmun remchang lai apiangah felfai taka dah a ni a. Heng bawlhhlawh bawm a thil paih te hi kartin vawihnih lakkhawm niin chungte chu bawlhhlawh paihna hmunah paih thin a ni. Heng bawlhhlawh bawm hunte hian vengchhung kawngpui a bawlhhlawh paih mai mai turte nasa takin a veng a, a tangkai em em a ni.

5. Tui luankawr chungchang : Village Council te hmalakna in tuihawk luanna tur mumal takin siam a ni a, hei hian khawchhung kawtthler a tui luang darh nuai turte a veng a, khawlai bal tur leh bawlhhlawh lo awm turte tuihawk luankawr tha tak a awm avang hian a veng tha hle a ni.

6. Thingphun chungchang : YMA hmalakna in vengchhung kawngpui kamah Thing chi hrang hrang phun a ni a, chhungtinte mahni inbul remchang laiah thing hi phun a ni bawk a, heng thing te hian veng a cheimawi bakah boruak lum lutuk turte vengin khua a ti nuam tak zet a ni.

Bawlhhlawh awmlohna khua kan nih theihna chhan hrang hrang kan sawi tak te bakah hian Bialtu MLA in theihtawp min chhuahpui a, a inpekna avangin nasa takin kan khua hian hma a sawn a ni.

Tunah chuan kan khua Hmunsang chu sawrkar hmalakna avang te, Village Council leh YMA hmalakna avangte bakah mipui tanrualna leh inpekna avangin bawlhhlawh awmlohna khua kan lo ni thei ta a ni. Hei hian hriselna kawngah pawh nasa takin hma min sawn tir a, tunhma a hrisel lo leh damlo tam em em thin kha tunah chuan mi hrisel tak te lo ni tawh in, damlo pawh an lo tlem ta hle, khawnuam leh khaw hrisel tak a lo ni ta.

Hmunsang khua ang hian i khua pawh kha bawlhhlawh awmlohna khua ah i siam ve thei tih hria la, he thu i chhiar zawh atang hian khawifai ni turin ke penchhuak nghal rawh le.

Comments

Chhiar Hlawhte