Mizoram-a COVID-19 hri kai sangkhat tling ta

Niminpiah khan Mizoram-ah COVID-19 hri kai mi 29 zet hmuhchhuah leh niin Mizoram-a hri kai hmuhchhuah chuan sang khat a tling ta.

Niminpiah khan ZMC Laboratory-a RT-PCR khawl hmanga Swab Sample enfiah 514 zingah COVID-19 vei 26 hmuhchhuah thar niin Lunglei Civil Hospital TrueNAT Laboratory-a Sample enfiah 43-ah COVID-19 hri kai 1 hmuhchhuah a ni bawk a. Rapid Antigen Test 521 tih niin COVID-19 vei hmuhchhuah thar 2 an awm bawk.

Niminpiah a Mizoram-ah COVID-19 hri kai hmuhchhuah zingah hian tunhnaia hri kai lo hmuhchhuah tawh te nen lo inkawmhnaih atanga hri kai hmuhchhuah an awm nual a. Zangena Petrol pump-a thawk hri kai chhuizuina atangin Aizawl Bawngkawn-ah hri kai mi 2 hmuh an ni a, Zangena Petrol pump-a kal COVID-19 positive Khanpui khua, Mizoram Police Saipum-a post mek in a lo kawm hnaih atangin hri kai mi 4 hmuh niin Zemabawk mi vek an ni a, Aizawl Venglai Local Level Task Force Member mi 3 te pawhin hri an kai tih hmuhchhuah niin hri kai hmuhchhuah te lo kawm hnaih atanga hri kai hmuhchhuah thar te hi mi 9 an ni.

ZMC-a hri kai hmuchhuah dang mi 16 te chu State pawn atanga rawn lut te vek niin Sipai chawlh la rawn haw mi 7 an tel a, midang te chu Goa, Maharashtra, Assam, Tamil Nadu, West Bengal leh New Delhi atanga rawn haw leh Quarantine Centre-a awmlai an ni thung.

Lunglei Civil Hospital TrueNAT Laboratory-a COVID-19 hri kai hmuhchhuah thar hi mipa kum 37 a upa niin Guwahati, Assam atanga lo lut a ni a. Rapid Antigen Test hmanga CO-VID-19 hri kai hmuhchhuah thar 2 hi mipa ve ve niin Mamit District ami an ni a, West Bengal atanga rawn lut an ni bawk.

Nimin thleng khan Mizoram-ah COVID-19 hri kai 1003 awm tawhin mi 514 te chu enkawl dam an ni tawh a, mi 489 enkawl mek an ni.

India ramah hri kai leh enkawl dam an pung zel :

S Darkar 24 kalta chhung khan India ramah COVID-19 hri kai mi 77,266 zet hmuh leh niin nikhat-a hri kai hmuhchhuah an tam ber ni a ni leh a, hemi hun chhung vek hian mi 60,177 te chu enkawl dam an ni bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 9,01,338 enfiah leh niin heng atang hian hri kai 77,266 zet hi hmuhchhuah leh an ni a, hei hi nikhat-a India ram-a hri kai hmuhchhuah tam ber ni niin India ram ah hri kai hmuhchhuah hi an pung zel a, nimin thleng khan Sample 3,94,77,778 enfiah ni tawhin hri kai hmuhchhuah 33,87, 500 an tling tawh bawk a, India rama mipui zawng zawng atanga chhutin zaa 2.92 te sample enfiah ni tawhin sample enfiah atanga zaa 8.58 te chuan hri an kai a ni.

India rama hri kai hmuhchhuah an pun zel rual hian enkawl dam pawh pung ve zelin darkar 24 kalta chhung khan mi 60,177 enkawl dam an awm a, tun thlenga India rama hri kai enkawl dam chu mi 25,83,948 tling tawhin hri kai hmuhchhuah atanga zaa 76.28 te chu enkawl dam an ni tawh a, tunah hian hri kai enkawllai 7,42,023 an la awm mek bawk a, hri kai zingah nunna chan 61,529 an awm tawh a ni.

Comments

Chhiar Hlawhte