COVID-19 hripui leng kara Mizoram Assembly thutkhawm nei turin inbuatsaihna kalpui mek a ni

Karleh Thawhlehni, September 1 atanga Mizoram Legislative Assembly thutkhawm vawi 6-na nei turin inbuat- saihna tluang taka kalpui mek a ni a. Hripui len laia thutkhawm neih tur a nih avangin ruahmanna hrang hrang siam belh niin Member te pawhin Dawhkan an intawm dawn lo bawk. India Danpui (Constitution of India) Article 174-na in ‘Assembly Session thutkhawm ni hnuhnung ber leh thutkhawm neih leh ni hmasa ber inkarah thla 6 a tla tur a ni lo,’ a tih angin Mizoram Legislative Assembly 8-na thut-khawm vawi 6-na hi hri leng mek karah September 1, 2020 atang khian neih tum niin ni thum chhung a awh dawn a, Mizoram Legislative Assembly Commissioner & Secretary, H. Lalrinawma chuan he thutkhawm neih tur chungchang hi nimin khan sawifiahin, Hripui leng vangin tum danga tih ngailoh inbuatsaihna chipchiar taka duan niin hri laka invenna tur ruahmanna kimchang taka siam a ni tih a sawi a. MLA te leh Session chhunga Assembly Building-a lut turte zawm tur Standard operating Procedure (SoP) siam niin MLA zawng zawng leh Official te hnenah semchhuah a ni a. Building luh dawnah sanitizer-a kut silfai vek tur niin a chhunga lut te Thermal Scanning tih vek a nih hnuah Thermal Scanning paltlang te Hming, Contact number leh Address chhinchhiah zel a ni ang. 

Assembly Session Hall-a lut thei Thermal Scanning tih atang hian 99F aia sang khawsik nei te, tunhnaia khuh, thawhah leh awmna nei te chu Session Hall a an luh phalsak a ni dawn lova, hei bakah hian tunhnaia quarantine mek nena contact nei te, Containment emaw lockdown area atanga kal te, COVID-19 positive chenpui emaw tunhnaia positive nena contact nei leh COVID-19 lanchhuah dan (symptoms) hrang hrang nei te pawh luh phalsak an ni dawnlo tih a sawi bawk a ni.

MLA te leh midang tu pawh Assembly Compound chhung leh Session Hall chhungah te Social Distancing dan zawm tur leh Face mask englai pawha vuah reng tura beisei leh hriattir an ni a. Social Distancing dan zawm a nih theih nan Chief Minister leh Speaker te duhdan leh thurawn angin Session Hall-ah dawhkan leh thutna dah belhin member-te dawhkan intawm lova a mala an thut theihna turin siamrem a ni bawk. Hei bakah hian Deputy Medical Superintendent, Civil Hospital Aizawl chu Nodal Officer-ah ruat niin ani hovin Doctor leh Medical Staff dang engemawzat Session chhunga duty turin ruat an ni a. Hemi bakah hian Disaster Management & Rehabilitation Department Director chu Disaster Management Act, 2005 leh SOP hrang hrangte tha taka zawm a nih theih nana enpui turin ruat a ni bawk.

Assembly thutkhawm vawi 6-na atan hian nimin thleng khan House chhunga tawngka a chhan chi zawhna, Starred Question 239 a lut tawh a, ziaka chhan chi zawhna, Unstarred Question pawh 58 a lut tawh bawk a. Assembly Session kalphung pangngai angin Starred Question hi ni khatah 20 zel a lut ang a. Zawhna lutkhawm atangin nitin zawhna 20-te hi Ballot hmanga pawh thin a ni ang a. Member pakhat zawhna chu a tam berah ni khatah 5 aia tam lo a lut ang.

Assembly Session neih chhunga chhan hman loh Starred Question te hi Unstarred anga letin Member zawng zawng hnenah a chhanna pek an ni ang a. Ni khata zawhna 20 lut zingah Question hour (darkar khat) chhunga chhan hman loh a awm chuan Session tawp nia-h Member zawng zawng hnenah a chhanna pek an ni ang.

Tun tuma Assembly thutkhawm neih turah hian Sawrkar Bill 8 a lut tawh bawk a, heng zingah hian Dan dinglai siamthatna tur leh hri leng avanga Ordinance hman mek, The Mizo-ram (Containment and Prevention of the Spread of Covid-19) Bill, 2020 pawh a tel a ni.