Mizoram-a COVID-19 hri kai hmuh zinga zaa 44.91 chu Paramilitary Force mi an ni

Mizoram-a COVID-19 hri kai hmuhchhuah zinga zaa 44.91 chu Force mite niin a dang zaa 24.32 te chu State pawn atanga bungrua rawn phurluttu Truck enkawltute an ni thung.

Nimin a sawrkar thuchhuah tarlan danin nimin thleng khan Mizoram-ah COVID-19 hri kai mi 860 hmuhchhuah ni tawhin heng zinga mi 384 enkawl dam ni tawhin hri kai enkawllai 476 an la awm a, hri kai hmuhchhuah zinga a zatve dawn, zaa 44.91 te chu Paramilitary Force mi leh sa niin Paramilitary Force mi leh sa hri kai hmuchhuah hi 371 zet an tling tawh a, Paramilitary Force mi leh sa hri kai zingah hian mi 155 te chu enkawl dam an ni tawh thung a ni. Paramilitary Force zingah BSF atanga hri kai hmuhchhuah tam berin BSF Sipai 230 te chuan hri an kai tih hmuhchhuah a ni tawh a, an zinga mi 66 te chu enkawl dam ni tawhin hri kai enkawllai 164 zet an la awm a, Assam Rifles zingah hri kai 101 awmin mi 53 an dam tawh a, mi 48 enkawl mek niin NDRF mi leh sa hri kai 32 hmuhchhuah te chu enkawl dam vek an ni tawh a, CRPF Sipai zingah hri kai 4 hmuh ni tawhin 3 enkawl damin enkawllai pakhat ala awm a, Indian Army leh CIJWS, Vairengte atangin hri kai 4 hmuhchhuah niin pakhat enkawl dam a ni tawh a, mi 3 enkawl mek an ni bawk.

Mizoram-a hri kai hmuhchhuah zinga 366 (zaa 29.73) te chu Civil mi te ni thungin heng zinga 223 te chu enkawl dam an ni tawh bawk a, tunah hian Civil mi zinga hri kai enkawllai chu 143 an la ni a, hri kai zinga 117 te chu State pawn atanga bungrua rawn phurluttu Truck enkawltute niin an zingah hian hri kai enkawl dam erawh an la awmlo bawk. Hetihlai hian COVID-19 hri dona kawnga thawktu (Frontline Workers) zingah hri kai hmuhchhuah mi 6 an awm tawh bawk a, heng zinga mi pakhat chu enkawl dam ni tawhin midang 5 chu enkawl mek an la ni bawk.

Mizoram-a COVID-19 hri kai hmuhchhuah mi 860 zinga a tam zawk, mi 795 te chu State pawn atanga rawn lut an ni a, midang 65 te chu Mizoram chhung mi leh sa, State pawn lama zinchhuahna neilo te an ni thung a ni.

Mizoram-ah hian Swap Sample 28,076 enfiah a ni tawh a, ZMC-ah Sample 22,764 enfiah niin Lunglei Civil Hospital (Truenat-PCR)-ah Sample 1471 leh Rapid Antigen Test hmangin Sample 3783 enfiah a ni tawh bawk a, hmundangah Sample 58 enfiah a ni bawk.