Chanchin thar thenkhat :

 Mipui himna tur ngaihtuah

Village Council inthlanpui nei turin Cham-phai District-ah inbuatsaihna kalpui mek niin nimin khan Champhai DC, Maria CT. Zuali hovin tunlai hri leng mek laka Vote thlaktute him theih dan tur sawiho a ni a. He huna ruahmanna an siam dan chuan inthlan hmain vote neite hnenah Voter’s Slip, VC Roll-a an Serial number indawt ang zel leh vote thlak hun tur darkar bituk tarlanna chu sem lawk vek nise , Voter’s Slip hi MPF kaih-hruaina hnuaiah semchhuaha inhrilhhriatna neih nghal zel  nise an ti a. Vote thlak turte an vote thlak hun tura bituk zelah vote thlak tura beisei an ni a, veng chhung Information Centre leh Whatsapp kaltlangin inhrilhhriatna neih zel tura ruahman niin mahni Vote thlak huna thlak zo hmanlo an awm a nih chuan a hrana ruahmanna siam tur a nih rualin, mahni hun-a Vote thlak zo turin hma-lak nise an ti bawk.


Thlalak phochhuahna nei

Nimin August 19, 2020-a World Photography Day vawi 181-na denchhena Mizoram School of Photography leh Photography Club of Mizoram ten an buatsaih, Thlalak Phochhuahna leh Inelna, ‘Digital Photo Art Exhibition & Competition’ vawi 4-na chu nimin khan I&PR Director, Lallianpuii chuan a Office-ah online-in a hawng a, Photo Exhibition hi kumdangah chuan hmun hrang hrangah neih thin niin kuminah erawh COVID-19 avangin Website hmanga phochhuah a ni ve thung a ni. World Photography Day 2020 Digital Photo Art Exhibition & Competition hi National & International Salon an neihdan zul zuia buatsaih niin Thlalak 244 lutin mi 37 an tel a. Section 5-ah then niin www.pcom.ga-ah en theih a ni.


MUP Recreation Centre hawng

Lawngtlai East bialtu MLA, H. Biakzauva chuan nimin khan Lawngtlai-ah Mizoram Upa Pawl (MUP) Recreation Centre a hawng a, he Recreation Centre hi kum 2007-ah RKVY sum hmanga sak niin an sak zawh theihloh hnuah MLA Fund leh MP Fund-a chhunzawm a ni.


Hri kai 45 hmuh belh leh

Niminpiah khan Mizoram-ah COVID-19 hri kai mi 45 hmuhchhuah leh an ni a, ZMC Laboratory-a RT-PCR khawl hmanga Swab Sample enfiah 366 zingah COVID-19 vei 30 hmuhchhuah thar a ni a. Rapid Antigen Test-a mi  327 enfiah ah COVID-19 vei 14 hmuhchhuah niin Lunglei Civil Hospital TrueNAT Laboratory-a sample 25 enfiah zingah COVID-19 vei hmuhchhuah thar pakhat a awm bawk. Hetihlai hian nimin khan hri kai en-kawl dam mi 5 awmin heti hian Mizoram-ah hri kai hmuhchhuah 860 an awm ta a, mi 384 enkawl dam ni tawhin hri kai enkawllai 476 an la awm mek bawk a ni.


Assam Rifles ten sawifiah

Niminpiah tlai-a Assam Rifles ten Vai-rengte Checkgate an paltlang chungchangah Assam Rifles hotute chuan Mizoram Home Department in mpass an pekchhuah loh avanga State sawrkar duhdan anga kal theilo an nih thu an sawi a. Assam Rifles hotute chuan an mi leh sa 15 te chu Mizoram-a awmsa, Assam-a Operation nei-a lo kir leh an ni tih sawiin, Vairengte-ah hian mpass an neihloh avangin Duty ten RAT Test an tihsak duhloh thu leh hei vang hian India ram khawi State ah pawh lut turin a hranpaa pass an mamawh lohna tura MHA in thuneihna a pek anga tlantlang an ni tih an sawi.

Comments

Chhiar Hlawhte