Mizoram Chief Minister in Award hrang hrang sem
India Independence Day vawi 74-na lawmna Inrinni kalta a Aizawl Sipai Lammual-a neih ah Chief Minister, Zoramthanga chuan chawimawina chi hrang hrang a semchhuak.Chief Minister hian Mizoram Police zinga hna thawk tha National Award dawng tura thlanchhuah te hnenah Award hlanin President's Medal for Distinguished Service chu C. Lalthanmawia MPS, Director, Fire & Emergency Services chuan dawngin Police Medal for Meritorius Service chu C. Lalruaia MPS, SP Aizawl leh Lalthakima, Inspector, Police Training School te chuan an dawng a. Hei bakah hian President's Police Medal for Distinguished Service chu LR. Dingliana Sailo IPS, CID (Crime) chuan dawngin Police Medal for Meritorious Service dawngtu mi pathum, Governor’s Gold Medal dawngtu mi pathum leh Governor’s Silver Medal dawngtu mi pathum te hnenah a hlan bawk a ni.
Huaisen lawmman ‘Jeevan Raksha Padak Award Sarvottam Jeevan Rakhsha Padak’ chu Lalrempuia, Vanbawng hnenah pek niin April ni 5, 2019-a a fapa tui tla a chhanchhuahna lamah a nunna a chan a. Uttam Jeevan Raksha Padak chu C. Lianhawla, Tuidam khua hnenah pek niin May ni 15, 2019 khan a nupui nen lo-a an feh laiin Savawm in a nupui chu a bei thut a. Hmanraw dang chelek engmah nei lovin chemtum nen beiin a nupui hi a chhanhim bawk a ni. Jeevan Raksha Padak chu Lalawmpuia, North Serzawl hnenah hlan niin nikum June 26 khan Lalawmpuia te chenna In hi a kang a. An chhungkaw member 6, kang hlum mai thei tur dinhmuna ding te chu a chhanchhuak a ni.
Mizoram State Teachers’ Award chu High School Section-ah Vanlalhliri Sailo, Headmistress, Govt. Hnahthial H/S, Hnahthial; Middle School Section-ah Malsawma Sailo, Headmaster, Govt. Garden M/S, Rahsi Veng, Lunglei leh Primary School Section-ah R.Lalpianthanga, Teacher, Govt. Chawnpui P/S Aizawl ten an dawng a ni.
Chief Minister’s Excellence Award in Public Administration chu Organization Category-ah Deputy Commisioner’s Office, Siaha District leh Aizawl Municipal Corporation ten dawngin Team Category chu Ajiveeka Grameen Express Yojana hmalakna an kalpui that avangin H. Lalchhandami, CEO, MZSRLM; Lalrammawia, Director, Transport Department, C. Lalbiakthanga, Jt. Director (STA) leh Dr. F. Laldinthara, State Mission Manager ten an dawng a. Individual Category-ah Shashanka Ala IAS, DC Lawngtlai chuan ‘Kan sikul, kan huan’ tih hmalakna avanga dawngin Lalrinawma Khiangte, BDO Phullen chuan Water Supply Project from Paite Tuikawr to BDO Complex including installation of Solar Pump vangin a dawng bawk.