Latest News

Vaccine pe chhunzawm dawn

 Serchhip District chhunga Health Care Workers te hnena COVID-19 Vaccine, Covishield pek hna thawh mek chu Inrinni leh Pathianni te chawlh anih hnuah Vawiin hian Vaccine pekna tura ruahman hmun thum-ah pek chhunzawm a ni leh dawn a, thudawn danin Serchhip District chhunga mi 450 te hri danna pek turah ni 2 chhung khan mi 306 te chu hri danna hi pek hman an ni a, Presbyterian English School leh Midland M/S-ah mi 121 ve ve te hri danna pek ni tawhin Thenzawl CHC-ah mi 64 te hnenah hri danna hipek an ni tawh bawk a ni.

MNF sawrkarin SEDP cheng nuai 3 sem tumna a nei tak tak lo niin MPCC in an sawi

MPCC hruaitute chuan MNF sawrkarin SEDP cheng nuai 3 sem tumna a nei tak tak lo niin an sawi.

Inrinni-a Aizawl Press Club-a thuthar thehdarhtute an kawmna ah Mizoram Pradesh Congress Committee (MPCC) hruaitute chuan kan hma lawk, August ni 27,2020-a Village Council leh Local Council thlanna lo awm turah MNF hruaitute chuan SEDP hnuaia cheng nuai 3 sem chungchang an sawi uar thar leh ta hle nia sawiin, Inthlan awm loh laia sawi ngai si lo, inthlan dawn veleh a SEDP cheng nuai 3 sem an rawn sawi chhuak leh ta chu mipui bum tumna, mipui rilru hruaikawi tumna dik tak niin an sawi a ni.

MPCC hruaitute chuan kum 2018 MLA Election dawna MNF President, Zoramthanga sawi uar ber chu SEDP cheng nuai 3 sem tur thu a ni tih sawiin, “Mizoram-a chhungkaw tin, NLUP dawng tawhte pawhin an dawn leh vek tur thu chiang takin a sawi a, hei hi a video clip pawh en mai theihin a la awm thlap a ni. Sawrkarna an siam hnuah erawh a thusawi dan a thlak leh ta daih a, ‘Project Base a pek tur a ni a, a semin kan sem dawn lo’ a ti leh daih tawh. June 16, 2019-a Pu Zoramthanga, CM-in Assembly Annexe Building-a Press Conference a neihah nuai 3 hi pawisa faia sem tur a ni loh thu a sawi a, 2020 Budget Session zawhna leh chhannaah sum faia nuai 3 sem tur a nih loh thu a sawi bawk. Hei hian inthlan hma leh inthlan hnua an danglam dan a tarlang chiang hle,” tiin “Chhungkaw tam takin SEDP cheng nuai 3 dawn an lo in beiseina chu a thamral mek a, inthlan dawna mipui bum nana MNF auhla mai a ni tih a chiang chho zel a ni,” an ti bawk.

Comments

Chhiar Hlawhte