Latest News

MZI hruaitu thlanna nei

Mizo Zaimi Inzawmkhawm (MZI) Hqrs. Serchhip chuan nimin khan kum 2021-2022 chhunga an hruaitu tur thlanna MJA Serchhip District kaihhruaiin an nei a, President-ah Otto K. Lalchhuanawma (P&E Veng); Vice President-ah Lalramnghaka Kawlni (Tuikhuah Veng); Secretary-ah C. Zodinthara (Leisang Veng); Asst. Secretary-ah R. Lalrinfela (Bazar Veng); Treasurer-ah Lalnunsiami Khiangte (P&E Veng) leh Fin. Secretary-ah Johny Lalhruaitluanga (Venglai) te thlan an ni.

Independence Day hmang

India Independence Day vawi 74-na chu Inrinni khan Mizoram chhunga District khawpui hrang hrangah te pawh urhsun taka hman a ni.

Mizoram-a Independence Day lawmna pui ber Aizawl Sipai Lammual-ah neih ah Chief Minister, Zoramthanga chuan Hnam puanzar pawt-pharhin zahna chibai a buk a. Kum dang ang lovin kumin hian COVID-19 hripui leng avangin mipui pungkhawm tam lo zawngin hman a ni a, sawkar in kal thei tur chin a tih te bak he ni lawmna hian an tel lo a ni.

Chief Minister hian Mizoram mipuite Independence Day chibai bukin Sawrkar hma-lakna hrang hrang a sawi bakah hri leng avanga harsatna sukiang tura hmalakna te a sawi a, beisei loh lam atanga min runtu hripui hlauhawm takin ram pum a tuam mek a, kan himna tura inkaih-hruaina dante leh mithiamte thurawn ngai pawimawh a, kan zawm tlat chuan he hripui lakah pawh hian kan him zel a beisei thu a sawi a, khuarel chhiatna avanga harsatna tawh mekte harsatna sukiang turin sawrkar laipui leh state sawrkar pawhin theihtawp a chhuah reng tih a sawi bawk.

Independence Day hi Lunglei-ah chuan Agriculture Minister, C. Lalrinsanga hovin Conventional Centre kawt-ah hman niin Champhai-ah chuan I&PR Minister, Lalruatkima hovin DC Office tual-ah hman a ni a. Siaha-ah Social Welfare Minister, Dr. K. Beichhua hovin DC Office tual-ah hman niin Lawngtlai-ah Health Minister, Dr. R. Lalthangliana hovin CYLA Playground-ah hman a ni bawk. Mamit-ah School Education Minister, Lalchhandama Ralte hovin DC Complex-ah hman niin Khawzawl-ah Deputy Chief Minister, Tawnluia hovin Field No-I ah hman a ni a, Hnahthial-ah Transport Minister, TJ. Lalnuntluanga hovin HBSC Ground No-I ah hman niin Saitual-ah Supply Minister, K. Lalrinliana hovin Saitual College kawt-ah hman a ni a, Kolasib-ah Deputy Speaker, Er. Lalrinawma hovin DC Office tual-ah hman a ni bawk.

Comments

Chhiar Hlawhte