Mizoram-ah hri kai thar 33 zingah ZMC-a Nurse a tel

Nimin khan Mizoram-ah COVID-19 hri kai mi 33 hmuhchhuah leh a ni a, hri kai hmuh-chhuah zingah hian ZMC-a hri kai damlo enkawltu Nurse pakhat a tel a ni. Sawrkar thuchhuah tarlan danin niminpiah khan ZMC Laboratory-ah Swab Sample 175 enfiah niin heng atang hian hri kai mi 31 hmuhchhuah an ni a, Rapid Antigen hmangin Sample 44 enfiah ni bawkin hri kai pakhat hmuhchhuah a ni bawk.

Niminpiah-a ZMC Laboratory atanga hri kai hmuhchhuah 31 zinga 29 te chu Sipai niin Quarantine Facility-a awmlai an ni a, Aizawl District-a Assam Rifles mi 18 leh BSF Sipai 9 bakah Kolasib District atangin Sipai pakhat chu hri a kai tih hmuhchhuah a ni a, Champhai District atangin RAT hmangin hri kai pakhat hmuh-chhuah niin ani hi Sipai a ni bawk. BSF Sipai hri kai hmuhchhuah te hi Quarantine Facility-a awm lai-a kai nia hriat an ni. Hei bakah hian niminpiah vek khan ZMC-a Nurse pakhat chuan hri a kai tih hmuhchhuah a ni bawk a, ani hi damlo a enkawl atanga kai a ni thung.

Niminpiah vek khan Lunglei Civil Hospital TrueNat khawl-ah sample 34 enfiah niin hri kai pakhat hmuhchhuah a ni bawk a, hri kai hmuhchhuah hi mipa kum 25 a upa, Assam atanga lo haw, Quarantine Centre-a awm lai a ni.

Mizoram-a hri kai zingah nimin khan Lawngtlai leh Thenzawl CCC atangin mi pakhat ve ve chhuahtir an ni bawk.

Nimin thleng khan Mizoram-ah Swab Sam-ple 22,211 enfiah ni tawhin heng atang hian hri kai hmuhchhuah 537 an awm tawh a, heng zinga mi 288 te chu enkawl dam ni tawhin State dang a thawnchhuah pakhat a awm bawk a, tunah hian hri kai enkawllai 249 an awm mek a ni. Mizo-ram-ah hri kai hmuhchhuah tam ber hi ZMC Laboratory atanga hmuh niin 469 hmuh an ni a, Rapid Antigen Test hmangin hri kai 21 hmuh niin midang 47 chu Laboratory dang-a hmuh an ni.