Mizoram-ah Hri kai mi 14 hmuh thar leh an ni

Darkar 24 kalta chhung khan Mizoram-ah COVID-19 hri kai mi 14 hmuh belh leh niin mi 13 te chu hnamdang an ni a, midang pakhat hi Petrol Pump-a thawk a ni thung.

Niminpiah khan ZMC Laboratory-a RT-PCR khawl hmangin Swab Sample 481 enfiah leh niin heng atang hian hri kai pakhat hmuhchhuah a ni a, he hri kai hmuhchhuah hi hnamdang niin Bawngkawn Veng mi, Quarantine Centre-a awmlai niin hri kai nen an lo inkawmhnaih atanga hri kai nia hriat a ni.

Hetihlai hian niminpiah khan Kolasib District-ah Rapid Antigen Test hmangin hri kai mi 12 hmuhchhuah belh leh an ni bawk a, heng te hi hnamdang vek niin lirthei khalhtute an ni a, Assam leh Meghalaya atanga lokal te an ni bawk. Nimin chhun khan Aizawl-ah Rapid Antigen Test hmangin hri kai pakhat hmuhchhuah leh a ni bawk a, he hrikai hmuh thar hi Zangena Petrol Pump-a thawk niin Symtoms a neih avanga mahni inringhlel leh enfiah niin hri a kai tih hmuhchhuah a ni.

Nimin-a hri kai hmuhchhuah thar mi 14 te nen hian tun thlengin Mizoram-ah COVID-19 hri kai hmuhchhuah 874 an tling ta a, nimin khan mi 18 te chu enkawl dam-a chhuahtir ni bawkin nimin-a hri kai enkawl dam te hi BSF mi 11, Assam Rifles mi 4 leh Civil mi 3 te an ni a, heng te nen hian Mizoram-ah hri kai enkawl dam chu 402 an tling tawh a, tunah hian hri kai enkawllai 472 an la awm mek bawk a. Aizawl District chu hri kai enkawllai tamna ber la niin mi 276 zet enkawl an la awm a ni.

India rama hri kai hmuhchhuah nuai 28 tling ta :

India rama COVID-19 hri kai hmuhchhuah chu nuai 28 an tling ta a, hri kai hmuhchhuah zawng zawng atanga zaa 73.9 te chu enkawl dam an ni tawh bawk. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample 9,18,470 enfiah leh niin hri kai hmuhchhuah thar 69,652 zet an awm leh a, hei hi nikhat-a hri kai hmuhchhuah tam ber tum a ni leh bawk a ni. Heng te nen hian India ramah COVID-19 hri kai mi 28,36,925 hmuhchhuah an ni tawh a, darkar 24 kalta chhungin mi 58,794 enkawl dam niin hri kai enkawl dam zawng zawng pawh 20,96,664 an tling tawh a, hei hi hri kai hmuhchhuah atanga chhutin zaa 73.9 an tling tawh bawk a, tunah hian hri kai enkawllai 6,86,395 an la awm bawk a ni.

India ramah hian hri kai hmuhchhuah atangin nunna chan 53,866 an awm tawh a, darkar 24 kalta chhung khan nunna chan 977 an awm leh bawk a ni. ICMR chhinchhiah danin India ramah hian Sample 3,26,61,252 enfiah a ni tawh a, heng atanga hri kai hmuhchhuah chu 28,36,925 niin hei hi Sample enfiah atangin zaa 8.68 a ni bawk.

Comments

Chhiar Hlawhte