Coordination Meeting on COVID-19 neih a ni

Nimin khan Health Minister, Dr. R. Lalthangliana hovin Coordination Meeting on COVID-19 neih a ni a, he hunah hian sawrkar mi pawimawh thahnem tak an tel a ni.

SAD Conference Hall-a he thutkhawm ah hian COVID-19 dona kawnga hmalak chhunzawm zel dan tur rel niin COVID-19 Frontline Medical Workers, a bikin Sample lakhawmtute leh COVID-19 vei enkawlna hmun Covid Care Centre (CCC) leh Dedicated COVID Health Centre (DCHC) a thawkte an In lamah haw lova hmun khata an riah khawmna tur District tinah ruahman tha an ti a. Vairengte-ah Covid Care Centre leh COVID-19 Frontline Medical Workers-te awmna tur ruahman tul ni a hriat niin hmalak thuai tum a ni bawk.

He Meeting-ah hian Mizoram District 10 -a dah tur Truelab Quattro Real Time Quantitative Micro PCR Machine in an awmna tur District a thlen vek tawh thu tarlan a ni a, a dahna tur hmun leh thildang danga Civil Works pawh tunkar hian zawhfel a nih dawn thu sawi niin, tun thla ralhma ngeia hman tan theih tura bun fel vek beisei a nih thu tarlan a ni. A enkawltu tur Doctor leh Technician-te pawh training pek fel vek an ni tawh a ni.

He hunah hian Health Minister Dr. R. Lalthangliana chuan sawrkar laipui-a Ministry of Health & Family Welfare-in an chhut danin Mizoram-ah hian December thla tir lamah COVID-19 hmuhchhuah zatin 5000 chuang a kai dawn tih sawiin, hetiang dinhmuna kan awm avang hian lo in ruahman lawk a tul hle a ni, a ti a. Contingency Plan te siam a tul a, nasa takin ngaihtuahna sen mek a ni, a ti a. Contact tracing tih laia sample laksakte chu an result a chhuah hma chuan anmahni leh an chhungte Home Quarantine-in an awm tur a ni tih a sawi bawk.

ZMC chu Dedicated Covid Hospital-a puan a nih avangin COVID-19 vei nilo enkawl nan a hman theih rih lo tih he hunah hian tarlan a ni bawk a. State pawn atanga damlo rawn haw damdawi In-a inenkawl chhunzawm nghal ngai an awm thin avangin Lengpui an rawn thlen veleh a Rapid Antigen Test an tih sak result chhuah hma a an lo awm lailawkna tur pawh ngaihtuah niin ruahmanna siam thuai tum a ni bawk.

COVID-19 dona kawnga thawktu (manpower) indaihlohna a nasat thu pawh he hunah hian sawilan niin, hmalam hun atana inbuatsaih a tul bawk si avangin manpower indaihlohna phuhruk dan tur sawiho a ni a, COVID-19 reh fel hma, abikin kumin December thla tawp thlenga Temporary Basis a rawih tur COVID-19 Frontline Workers mamawh belh zat chhut chhuah chu mi 1151 an ni tih tarlan a ni a. Heng bakah hian hmun hrang hranga duty tur mamawh COVID-19 Frontline Workers 184 an la awm bawk ni a chhut a ni.

Comments

Chhiar Hlawhte