Latest News

Mizoram-ah COVID-19 kai 21 hmuh belh leh an ni

Mizoram-ah COVID-19 hri kai mi 21 zet hmuhchhuah thar leh an nih avangin Mizoram-a COVID-19 hri kai hmuhchhuah chu mi 895 an tling tawh.

Sawrkar thuchhuah tarlan danin niminpiah khan ZMC Laboratory-a Sample enfiah atangin COVID-19 hri kai mi 13 zet hmuhchhuah leh niin heng mite hi Aizawl District mi 12 leh Siaha District mi pakhat an ni a, Rapid Antigen Test (RAT) hmangin Kolasib District-ah hnamdang driver 7 te chuan hri an kai tih hmuhchhuah ni bawkin Lunglei-ah Assam atanga rawn haw hri kai hmuhchhuah pakhat an awm bawk a ni. Niminpiah a Aizawl District-a hri kai hmuhchhuah zingah hian tunhnaia hri kai hmuhchhuah tawh te nena lo inkawm hnai mi 9 zet an awm a, Chaltlang Lily Veng-ah mi 3, Sawleng-ah mi 3 leh Darlawn-ah mi 2 bakah Durtlang North-ah mi pakhat te an ni.

Heti hian nimin thleng khan Mizoram-ah COVID-19 hri kai mi 895 hmuhchhuah an ni tawh a, heng te hi mipa 739 leh hmeichhia 156 te niin nimin khan Lunglei District-a hri kai mi 15 te chu enkawl dam niin ZMC atangin mi 3 enkawl dam an ni bawk a, tun thlengin mi 420 te chu enkawl dam an ni tawh a, tunah hian hri kai enkawllai 475 an la awm mek bawk a ni.

Mizoram-a COVID-19 hri kai hmuhchhuah zingah hian mi 372 (38.74%) te chu Paramilitary Force mi niin BSF mi 231, Assam Rifles 101, NDRF mi 32 leh CRPF leh Indian Army 4 ve ve an ni a, hri kai zinga zaa 28.63, mi 136 te chu State pawn atanga lirthei rawn khalhtu te niin midang 381 te chu Civil mi te an ni thung a, COVID-19 dona a thawktu hri kai mi 6 an awm tawh bawk. Mizoram-a hri kai hmuhchhuah zinga 819 te chu State pawn atanga rawn lut an ni bawk.

India ramah COVID-19 kai nuai 29 chuang tawh :

India rama COVID-19 hri kai hmuhchhuah chu nuai 29 an chuang ta a, hri kai hmuhchhuah atanga zaa 74.29 te chu enkawl dam an ni tawh thung. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample 8,05,985 enfiah leh niin heng atang hian hri kai 68,898 hmuh leh an ni a, heng te nen hian India rama sample enfiah 3,34,67,237 atangin hri kai 29,05,823 hmuh an ni ta a, Sample enfiah zawng zawng atanga zaa 8.68 te chuan hri an kai tawh a ni.

Tunah hian India rama hri kai mi 21,58,946 te chu enkawl dam ni tawhin hri kai hmuhchhuah atanga zaa 74.29 te chu enkawl dam an ni tawh a, tunah hian hri kai enkawllai 6,92,028 an la awm mek bawk a ni. India rama hri kai hmuh atang hian mi 54,849 te chuan nunna an chan tawh bawk a ni.

Comments

Popular News (Last 30 Days)