Assembly thutkhawm in ni 3 chhung awh dawn

Mizoram Legislative Assembly thutkhawm chu thla thar September 1 atang khian neih a ni dawn a, ni thum (3) chhung a awh ang.

Mizoram Larsap in Assembly thutkhawm neih tur hi a koh hnuah Assembly Speaker, Lalrinliana Sailo kaih-hruai Business Advisory Committee chuan nimin-piah khan Assembly thutkhawm hun chhung tur leh hun hman dan tur hi an ruahman a, Assembly Business Advisory Committee (BAC)-in a ruahman dan chuan, Session tan ni-ah Session liamta leh tun tum Session neih tur inkara MLA thi mi panga sûn a ni dawn a, zawhna leh chhànna hun hman a nih dawn bakah, sawrkar thil pawimawhte ngaihtuah a ni ang. September 2 leh 3-ah thutkhawm chhunzawmin zawhna leh channa hun hman a ni anga, sawrkar thil pawi-mawh ngaihtuah tur a awm chuan ngaihtuah a ni bawk ang.

Mizoram Assembly Speaker, Lalrin-liana Sailo chuan hri leng mek mah se ram Danpui in ‘Assembly thutkhawm hnuhnung ber leh a dawtleh inkarah thla ruk (6) aia tam a tla tur a ni lo’ a tih avangin rorel Inkhawm kaltlangpui a ngai tih a sawi bawk. Speaker chuan hri leng avang hian Official Gallery-a kal thei chin pawh tihtlem a ni dawn tih a sawi a, thutna pawh inkarhlat thei tura sawi danglam tum a nih thu a sawi bawk.

Tun tum Assembly thutkhawm ah hian Dan dinglai siamthatna tur, Amendment Bill 2 lut tawhin Bill hi 14 lut tura beisei a ni a, tun thlengin House chhunga tawngka a chhan hi zawhna 239 leh ziaka chhan chi 56 a luh tawh bakah Paper Lay tur 2 a lut tawh bawk a ni.