Mizoram-ah August, 2020 chhung atan inkhuahkhirhna kalpui chhunzawm a ni dawn

Mizoram sawrkar chuan Vawiin, August ni 1, 2020 atanga kalpui tur Mizoram-a inkhuahkhirhna atan kaihhruaina a tichhuak thar a, ramri khar mek-a inkaihhruaina chu a ngai anga kalpui tur niin zan lama Curfew puan pawh la kalpui zui a ni ang.

Hemi chungchanga nimin-a Mizoram State Disaster Management Authority, State Executive Committee Chairman leh Mizoram Chief Secretary ni bawkin hriattirna a tihchhuah atanga a lan danin August 1, 2020 atanga August 31, 2020 chhunga inkhuahkhirhna kalpui turah hian Mizoram luhchhuahna, International Border leh Inter-State Border khar mekte chu khar chhunzawm a ni anga, Lengpui Airport chu hawng chhunzawmin Bairabi, Vairengte leh Kanhmun kaltlang kawngpuite erawh chu Mizoram-a hman tur bungraw phurlut leh Mizoram-a thar leh siam bungrua phur chhuak lirtheite tan hawn a ni ang. Mizoram pawn atanga lo lut tur reng reng chu Quarantine tur niin Quarantine dan tur fel taka ruahman a nih theih nan Mizoram an rawn luh hma-in mCOVID-19 mobile application-a mPASS-flight emaw mPASS-entry of persons hmangin an in-register hmasa tur a ni a, Mizoram-a lo lut reng reng chu Entry Point-ah uluk taka Screening kalpui chhunzawm zel a ni ang.

Mizoram chhunga Office zawng zawngte chu dan pangngaia kalin, Office tinah SOP for Social Distancing khauh taka kalpui tur a ni anga, District Hqrs. ah te chuan phalna nei lova vantlang hmuna mi panga (5) aia tam awmkhawm khap a nih bakah zan dar 8:30 leh zing dar 4:30 inkarah pawnchhuah khap tlat a ni anga, hemi atan hian District Magistrate ten Section 144 CrPC tlawhchhanin thupek an chhuah ang. Loh theihloh thil a nih loh chuan kum 65 chin chunglam te, taksa hriselna lama harsatna nei sa te, naupai te leh naupang kum 10 hnuailam te chu mahni inchhungah inkharkhip tur niin Pawn (vantlang/puipunna hmun, dawr, office, damdawi In, clinic adt.) chhuak tur reng reng chuan facemask emaw hmanraw dang hmangin hmai an tuam ngei tur a ni a, Vantlang hmun leh dawr-a kalte chu metre hnih tal-a inhlata awm tur a ni.

Mizoram-a sumdawnna Motor hrang hrang ah te Registration-a seating capacity tarlan aia tam phurh khap niin lirthei khalhtute leh an phurh ten facemask an vuah vek tur a nih bakah Passenger-te hman tur Hand Sanitizer an pai reng tur a ni a, Commercial passenger lirtheite kaihhruaina Standard Operating Procedure (SOP) pawh zawm ngei tur a ni.

School, College, Educational leh Coaching Institution te chu khar chhunzawm an ni anga, Central leh State Sawrkar hnuaia Training Institution te chu sawrkar laipui in SOP a chhuah zawm chunga hawn theih a ni ang. Mipui ten a hmuna an en theih tur Games & Sports Tournament huaihawt phal a ni lova, entu mipui pun-khawmna tello Games & Sports practice chu neih phal niin mi 25 aia tam punkhawm khap a ni.

Cinema Hall, Swimming Pool, intawl-lenna hmun, Auditorium, Assembly Hall leh hetiang hmunte chu khar chhunzawm tur niin Sakhaw biakna hmunah te mipui punkhawmna thil huaihawt phal a ni lova, Zing tawngtai inkhawm erawh mi 50 aia tam lo inkhawm phal a ni. Mitthi vuina, lungphun, inneihna, anniversary, pawl thila kalkhawmna, book release leh a dangte ah chuan mi 50 aia tam punkhawm khap niin mi tam takin an eizawnna kawnga harsatna an tawh te sutkian puina atan, mi 25 aia tam lo punkhawmna tur thilah chuan Deputy Commissioner ten kaihhruaina fel tak siamin phalna an pe thei ang. 

Phai atanga bungraw la lut tur reng reng chuan mCOVID-19 mobile application-a mPass hmangin declaration an thehlut tur a ni a, Dawr, sumdawnna hmun leh eizawnna hmun dangte chu a pangngaia hawn theih a ni bawk.