Lirthei enkawltu zingah hri kai hmuh vangin bungraw phurh lirthei khuahkhirhna siam a ni

Kolasib District chhung Thingdawl leh Kawnpui inkar kawng chhia avanga Lirthei tangkhang zinga Driver 18 leh tualchhung mi 1, an vaiin mi 19 chu COVID-19 hri an kai tih hmuhchhuah a ni a, hei vang hian nimin-a Chief Minister hova Council of Ministers thukhawm chuan State pawn atanga bungraw phurh luh khuahkhir a rel bawk.

Nimin khan Kolasib District Bawrhsap, Dr.H. Lalthlangliana chuan Kolasib-a thuthar thehdarhtute kawmin, Kawng chhiat vanga lirthei tang Driver te chu fîmkhur thu ah niminpiah chawhnu atangin Rapid Antigen Test (RAT) hmangin a hmunah Health Department ten an endik thu leh hemi atang hian COVID-19 hri kai mi 19 hmuh an nih thu an sawi a, heng hri kai mi19 te lirthei dinna bula Driver te chawlhna In pakhat-a naupang kum 12 mi pawh hri a kai tih hmuh a nih thu a sawi bawk. Heng hri kai hmuh thar te hi Thingdawl Polytechnic-ah khunghran nghal niin, anmahni bakah naupang chhûngte, mi 9 leh lirthei khalhtute nena lo inhnaihchilh mi 13 te pawh Thingdawl Polytechnic ah khung hran an ni bawk a. Heng bakah hian Driver tangkhang te chu an vaiin RAT hmanga an endik vek tur thu leh tun dinhmun ah lirthei 572 tangkhang an awm mek thu a sawi a, Mizoram-a lo lût tûr Vairengte dai-ah lirthei 100 chuang tangkhang an awm thu a sawi bawk.

Kolasib DC chuan Thingdawl chu lockdown nghal niin Kolasib paltlang tûr lirthei te chu National Highway-54 zawh rihlo tûrin a ngen a, Serkhan to Bagha road lamah emaw, Mamit lamah emaw thu leh awm hma chu hel turin an chah a, Test paltlang leh fihlim te chu kawng awmdan azirin Police ten an kaltlang tîr thu a sawi bawk.

Nimin-a thuthar thehdarhtute kawmna hunah hian Kolasib District SP, Vanlalfaka Ralte chuan phai atanga lirthei lût tûrte chu Cachar lama thuneitu bia in Mizoram rawn luhtîr lo tura an ngen tawh thu a sawi a, lirthei tangkhang buaipuitu Police duty te pawh Test vek tawh niin tun dinhmun ah an fihlim thu a sawi bawk. He hunah hian Kolasib CMO, Dr. Lalhlimpuia pawh in Rapid Antigen Test-na tur dang an chah mek thu a sawi a, thawktu ten tlaivâr in test hi an neih thu a sawi bawk.

Hetihlai hian nimin-a Chief Minister, Zoramthanga hova Council of Ministers thu-khawm chuan Kolasib District chhunga National Highway-a Truck engemawzat tangkhang mek Driver leh Handyman te Rapid Antigen Test hmanga an enfiahna ah COVID-19 vei an awm tih hmuhchhuah a nih avangin mipui an him zawkna turin Mizorama lo lut tur bungraw phur lo lut reng reng chu khuahkhirh tha tiin Bungraw phur motor reng reng chu nitin mamawh (essential commodities) phur an nih loh chuan luh khap an rel a. Essential Commodities phur lirthei khalhtu leh Handyman te hi Entry Point-ah Screening uluk taka tih a ni anga, Rapid Antigen Test a Negative chauh an luhtlang phal an ni ang. 

Hei bakah hian lirthei enkawltute hi kawnglak ah khawchhunga an riah awih an ni lo anga, lirthei in an bungraw dahna hmun an thlen hnuah pawh sawrkarin kaihhruaina dinglai a siam angin pawn-a chhuak lovin bungraw unload tu te nen pawh inhlat takin an awm ang a, bungraw unload zawh velah an let leh tur niin kaihhruaina tha taka an zawm ngei theih nan kawng lakah Police Patrolling pawh tam zawka kalpui tum a ni bawk.

Ruahman ang chuan Bungraw phur lirthei te hian Vairengte leh Kanhmun chauh pal-tlang theiin ramri dang chu khar a ni dawn a, Kolasib District dinhmun thlithlai a District Administration hmalakna te enpui turin Vawiin hian Minister pathum - Lalchhandama Ralte, Lalruatkima leh TJ. Lalnuntluanga te chu an kal nghal dawn a ni.

Comments

Chhiar Hlawhte