Latest News

Mizo mipuite bum tumna ah MZP in an ngai

Mizo Zirlai Pawl (MZP) chuan State Election Commission (SEC) in Village Council inthlan chungchanga thuchhuah a siam leh hemi siamthatna thuchhuah siam leh chu Mizo mipuite bum tumna ah an ngaih thu an sawi.

MZP General Hqrs. hian nimin khan hruaitute leh Adviser thutkhawm chu an President, B. Vanlaltana kaihhruaina ah neiin Mizoram Electoral Roll atanga Tuikuk te paih an la nih loh chungchang an sawiho a. He Meeting hian Mizoram chhunga Village Council leh Local Council inthlan lo awm turah Mizoram-a lo let duh tawh lova Tripura-a inbengbel duh tawhte Vote thlak phalsak an nih thu leh Election-a chuh ve theihna thlenga danin a phal thu State Election Commission (SEC) atanga thuchhuah (Ni 4.8.2020) a awm chu mak an tih thu an sawi a. Mizo mipuite leh pawl hrang hrang atanga sawiselna a awm hnuah ni 5.8.2020 khan SEC chuan order thar tichhuak leh nghalin Order hmasa a thlak (supersede) thu tarlan a ni chu Mizo mipuite bumna ni ah an ngaih thu an sawi a. He Order tharah hian anmahni duhthu ngeia Tripura-a awm thlang zawk Tuikuk te Mizoram Village Council inthlan a vote an thlak theih lohna tur leh an in candidate theihlohna tur tarlan a nih loh avangin Tuikuk te vulh tumna leh Mizo mipuite bum tumna ni theiah an ngai nghet tlat tih an sawi bawk.

MZP chuan SEC leh Mizoram sawrkar in Tuikuk anmahni duhthu ngei a Tripura-a awmte Mizoram VC Electoral Roll atanga paih theihna hun remchang a awm laia a paih lo chu an dem takzet tih sawiin, Cental Sawrkar, Mizoram sawrkar leh Tripura sawrkar ten Tripura-a awm tura inremna an siam vek tawh Tuikuk ten Mizoram VC Election 2020-a vote an la rawn nei thei leh Election-a an la chuh thei chu an ngai thiamlo takzet tih sawiin, a rang thei ang bera Electoral Roll atanga paih turin thuneitute chu an ngen bawk a. Tripura-a Tuikuk te chu Refugee an ni lo tih pawh sawiin, anmahni duhthu ngei a pem an nih thu leh Refugee anga SEC in a tarlang chu thil diklo a nih avangin rang taka siamtha turin SEC chu an phut thu an sawi bawk.

Comments

Popular News (Last 30 Days)