Chanchin thar thenkhat :

Chawnghei chhunzawm leh
Mizoram sawrkar Local Administration Department-in Hnahthial South-III Village Council a siam tharah Hnahthial Lungleng Veng mipui zatve aia tam behtira Hnahthial South-I lama a zatve aia tlem deuh behtir duhlohna lantirna kal zelah Lungleng Veng khawtlang chuan nimin August ni 6, Ningani atangin chawnghei an chhunzawm leh a. Joint Action Committee (JAC), Lungleng Veng hian an Veng pumpui Hnahthial South III-a beh vek law law an duh thu sawrkarah an lo thlen tawh a, chumi ngiat chuan chaw pawh hei nghei tawhin, an thu kal zelah thu lawmawm lam hre lova State Election Commission-in VC inthlan hun a puan tak avangin Lungleng Veng thalai rualte chuan an thil phut tihhlawhtlin ngiatin chawnghei an chhunzawm leh ta a ni.

Sector Officer training nei
Aizawl Municipal Corporation (AMC) huam-chhunga Local Councils inthlan lo awm tura Sector Officer/Magistrate mi pariat ten nimin khan Aizawl DC Conference Hall-ah Training neih a ni. State Election Commission-in kaihhruaina a siam angin AMC Ward hrang hrangte chu Sector pariat ah then a ni a, Sector khat hi Sector Officer/Sector Magistrate pakhat-in a vil ang. AMC Ward chhunga Local Councils inthlanna-ah hian heng mite hi Magisterial Power pek an ni. Nimin-a training hi Asst. District Municipal Election Officer, V.Lalmuanpuii chuan kaihruaiin he hunah hian State Election Commission in Sector Magistrate hna tura tarlante zirho a ni.

VC By-Election nei dawn
Mara Autonomous District Council (MA-DC) hnuaia 18-Siaha North-I Village Council a Member pakhat chu a boral avangin tun thla ni 28 khian by-election nei turin State Election Commission chuan a puang a, he bial-ah hian Polling Station pahnih awmin Vote nei mipa 716 leh hmeichhia 911, an vaiin 1627 an awm a ni. He inthlanna chuh tum te tan hian tun thla ni 19 thleng hming pekluh theih a ni ang.

MPC Party in phalna pe
MPC Party chuan Mizoram State Election Commission in August 27-a Village Council leh Local Council inthlan neih tura a ruatfel ta chu lawm-awm an tih thu sawiin, MPC Party te chu he inthlanna hmachhawn theuh turin an chah a. Hmun hrang hranga MPC Party mi, Zoram Peoples Movement (ZPM) Tangrual Pawl a nih laia Co-ordination Committee-a chanvo leh mawhphurhna la chelh zawng zawngte chu inhnukdawk vek turin an hriattir a, he inthlan chuh tura MPC Party mal a din duh leh Party dang thawhpui duh te pawh phalna an pe bawk a ni.

Thawhhona thuthlung ziak
Tun thla ni 27-a Local Council leh Village Council inthlanna lo awm turah MNF Party leh HPC te chuan thawkho turin nimin khan thuthlung an ziak a, heng party pahnih te hi Sinlung Hills Council inthlanpui-ah khan an lo thawkdun tawh a ni. Nimin a thawhhona thu-thlung an ziah ah hian Veng leh khaw hrang hranga thawhdun dan tur chu mahni khua leh Veng-a party pahnih te inbiakrem dan ang zel a nih tur thu leh Veng leh khaw hrang hranga awm te chuan he thawhhona thuthlung hi zah-a zawm tur a nih thu an tarlang bawk.

Comments

Chhiar Hlawhte