Latest News

H&TE Board thukhawm

SEDP hnuaia din, Higher & Technical Education Board chu nimin khan a vawikhatna atan Higher & Technical Education Minister, Dr. R. Lalthangliana hovin an thukhawm. Higher & Technical Education Board thutkhawm ah hian Higher & Technical Education Minister, Dr. R. Lalthangliana chuan he Board-a Vice Chairman, Dr. Vanlaltanpuia leh member dangte in-hmelhriattirna neiin Board Vice Chairman ah Dr. Vanlaltanpuia leh Member ah tawnhriat tam tak nei ruat an ni chu lawmawm a tih thu a sawi a. Zirna sang zawk hmasawnna atan Board hnathawh ah an thawhhlawk ngei a ring tih a sawi bawk. Minister chuan Hripui leng avangin zirna sang zawk bei turin phai lamah zirlai an kal theih dawn loh avangin zirlai tam takin Mizoram College-ah zirna an chhunzawn a ngai dawn tih sawiin, College ten zirlai a tam thei ang ber ten an admit theih nan Sawrkar in theihtawp chhuahin remruatna a siam mek thu a sawi bawk.
He hunah hian Board Vice Chairman leh MYC Chairman, Dr. Vanlaltanpuia chuan tunhnaia lawka Sawrkar Laipuiin zirna kalphung thar New Education Policy a puan chungchang sawiin, kalphung tharah thil thar inthlak a tam a, State te kan inher rem hle a ngai dawn tih a sawi bawk.
He Meeting-ah hian Mizoram University hnuaia Lunglei-a Southern Campus dinna tur chungchang, a bik takin State in a dinna atana ram pek tur chungchanga hmalak tawhna te, College te tih changtlunna atana RUSA hnuaia hlawh-tlinna leh hmalakna hrang hrang te, RUSA hnuaia sak Pukpui-a Mizoram Engineering College dinhmun leh hemi atana kawng, tui leh Eng mamawh dan te, Higher & Technical Education Department in zirna sang zawk atana hmalakna a neih mek leh hmachhawp te, Polytechnic thar hawn tur chungchang te leh zirna In sang zawka zirna tha ‘Quality and Excellence in Higher Education’ neih dan tur chungchangte chu sawiho a ni bawk.

Comments

Popular News (Last 30 Days)