Latest News

Lawngtlai-ah District Hospital building thar Minister in a hawng

Health & Family Welfare Minister, Dr. R. Lalthangliana chuan nimin khan khum 50 awm theihna tur District Hospital Lawngtlai building thar chu a hawng.

Hospital building thar hawnna puala Lawngtlai Chief Medical Officer Conference Hall-a inkhawm tawi buatsaihah Health Minister chuan Hospital building thar leh Quarters sak thar engemaw zat hawn theih a ni ta chu lawmawm a tih thu sawiin, building thar sak a nih theih nana hmalatu zawng zawng chungah lawmthu a sawi a. Hriselna chu mi zawng zawng mamawh a nih avangin hmun kilkhawr ber pawh thleng phaka hriselna kawnga hmasawnna a awm theih nan sawrkarin theih tawp a chhuah tih a sawi a, Hospital changtlung nei turin building tha neih ringawt a tawk lova, khawl tha leh thawktute a pawimawh tel vek a, chumi kawngah chuan Lawngtlai District Hospital leh Lawngtlai District-a Health Cacility hrang hrang tihchangtlun nan theihtawpa hmalak chhunzawm a nih tur thu a sawi bawk.

COVID-19 dona kawngah Ministry of Health & Family Welfare-in Mizoram chu India rama State leh UT zawng zawng zinga hma la tha ber (Best Performing State)-ah a puang tih sawiin Health Minister chuan, a chhan bulpui ber chu chunglam hna thawh a ni a, chu bakah a hmanrua sawrkar, tlawmngai Pawl, Kohhran leh mipuite tanrualna rah a ni bawk, a ti a. Pakhatna dinhmun hauh chhunzawm zel turin sawrkarin fimkhurna dan a zam te zawm chunga a tawp thleng tan mar pat a tul tih a sawi bawk.

Nimin-a hawn tak building thar hi IPD (In-patient Department) Building Block 1, Type-II Quarters Block 2 (Unit 12), Type-III Quarters Block 2 (Unit 12) leh Type-IV Quarters Block 1 (Unit 3) te a ni a. Tuna District Hospital Lawngtlai building luah lai mek chu OPD (Out-patient Department) building niin, tun dinhmunah khum 34 a awm mek a, Building thar luahluh a nih hunah chuan khum 50 a awm thei tawh dawn a ni.

50-Bedded District Hospital Lawngtlai sak hna hi Non Lapsable Central Pool of Resources (NLCPR) sum hmanga thawh niin, Mizoram PWD (Building)-in an enkawl a, cheng nuai 1188.75 sanction niin December 7, 2016 khan sak tan a ni a, kumin January 31 khan sak zawh a ni.

Lawngtlai-a IPD Building hi a chhawng (Floor 2) niin, Ground Floor (845.25 Sqm)-ah hian Gynaecology Ward, Paediatric Ward, Male Medical Ward, Female Medical Ward, Committee Room, Staff Room, Medical Superintendent Room, etc. a awm dawn a; First Floor (360.29 Sqm)-ah hian Male Surgical Ward leh Female Surgical Ward, etc. a awm thung dawn a ni.

Comments

Popular News (Last 30 Days)