Inthlanna felfai-ah ngai

State Election Commission chuan Village Council leh Local Council inthlan neih zawh tak chu felfai thawkhatah a ngai.

SEC Secretary Teresy Vanlalhruaii chuan he thu hi sawiin, “Dan leh thupek kenkawh kawngah harsatna a awm lo te, inthlan that ngai a awm lo leh Polling Booth-ah harsatna (Booth capturing) te a awm loh avangin a felfai thawkhatah kan ngai a ni,” a ti a. COVID-19 avangin inbuatsaihna chuan duhthu a sam tawk lo nia an hriat thu sawiin SEC Secretary chuan, “COVID-19 in min tihbuai avangin kan inbuatsaihna in duh thu a sam tawk lo a, rua-hmanna kan siam pawh 100% in a fel lo ang tih kan hria a. COVID-19 hian min tibuai lo se chuan tun ai hian inthlanna hi a felfai zawk ngei kan beisei a ni,” a ti bawk.

Inthlang ve thei lo Village Council leh Local Council te inthlan hun tur chu a la hriat mai theih loh tih sawiin SEC Secretary chuan, “District Election Officer te chu nitin COVID-19 dinhmun en turin kan ti a. Health Department lam nen inbiakpawh reng a ngai bawk a, DEO ten report an siam dan a zirin inthlan hun tur chu ruat a la ni ang,” a ti. 

Political Party thenkhatin tun tuma vote tla te dahthat a, LC leh VC inthlang turte nen a ruala vote chhiar an rawt chu a remchang lo nia sawiin, “Kan dan (rules) ah vote chhiar hi inthlan zawh veleh neih turin a ti a, chuvangin inthlan zawh ruala vote chhiar nghal hi a ngai a ni,” a ti. 

Vote thlak chhung a rei chungchangah SEC Secretary chuan, “Polling Station-ah Candidate te hming chuanna 'dummy paper' tar vek turin kan ti a, hei hi mi tam takin an lo en lo nge ni candidate te hming an zawn chhung a rei avangin Voting Compartment-ah an awm rei a. Hmun thenkhatah chuan chawhnu lamah Voting Compartment hi kan dah belh a, vote thlak pawh a reilo sawtin kan hria a ni,” a ti bawk.

Comments

Chhiar Hlawhte