Indian Medical Association (IMA) Mizoram State Branch chuan an member zingah COVID-19 hri kai an awm chu pawi an tih thu sawiin, he hri kai hi a eizawnna leh a hmalam hun zel ngaihtuah chunga ngaidam turin mipuite an ngen.
Hemi chungchanga thuchhuah an siamah Indian Medical Association (IMA) Mizoram State Branch chuan COVID-19 hri leng mekah India rama he hrileng enkawltu Medical Doctor 200 chuang laiin an thih phah hial tawh thu leh Mizo Medical Doctor zingah pawh mi 5 laiin he hri hi kai tawhin, mi pakhat phei chuan a thihpui hial tawh tih an sawi a. Fimkhur theihtawpa a veite leh vei nia rinhlelh te an enkawl chung hian vanduai palh an lo awm ve ta fo mai tih tarlangin, vanduaithlak takin an member pakhat, ZMC-a COVID-19 enkawlnaa thawk lai mek chuan July ni 20 khan he hri hi a lo kai ve thu leh a test result nghah lai mekin a thiante nen an lo in khelh avangin mi engemaw zatin harsatna an tawh phah thu leh a bikin Durtlang Leitan Veng phei chu in lockdown hial ngai khawpa harsatna an tawh phah avangin pawi an tih thu an sawi a ni.
Hetianga an member hri kai an lo awm chu pawi an tih thu leh a thil tihsual palh hi pawi a tih thu tarlangin IMA thuchhuah chuan, a eizawnna leh a hmalam hun zel ngaihtuah chunga ngaidam turin mipuite an ngen a. Mipuite pawhin Frontline a thawkte dinhmun derthawnzia an hriatpui tih an hriat thu leh midang pawh la kai palh zel thei dinhmun a ding an nih avangin thahnemngai taka lo tawngtai sak turin an ngen bawk.
Comments
Post a Comment