Industrial Development Board thutkhawm nei

Mizoram sawrkar-a Industrial Development Board thutkhawm vawi 6-na chu nimin khan Commerce & Industry Minister, Dr. R. Lalthangliana hovin Secretariat Conference Hall-ah neih a ni. Nimin-a Industrial Development Board thutkhawm ah hian Dr. R. Lalthangliana chuan Mizoram in tharchhuah kan neilo lutuk chu a manganthlak hle tih sawiin, mumal leh hlawk zawka tharchhuah kan neih theihna turin nasa taka hma kan lak a ngai a ni, a ti a. “State Budget hrim hrimah chuan COVID avang hian kawl a eng tehchiam lo,” tiin COVID-19 boruak a awm chung pawhin Union Finance Minister thusawi chu lawmawm a tih thu a sawi a. “Fifty thousand crores chu Ministry of Micro, Small and Medium Enterprises (MSME) ah dah a ni a, sum hrim hrimah chuan kan zia hret a. A guideline-ah hian Bank-te nen kan thawhho that a ngai hle a. PMEGP Loan-ah pawh tun hmaa harsatna chi hrang hrang kan tawh thinte kha felfai thlap si, awlsam zawka loan pek dan kan kalpui a ngai a. COVID avanga State dang atanga kan thalai lo haw te phai lama chhuk thla ngam tawh si lote tan eizawmnna kan dap sak a ngai a, theihtawp kan chhuah zel dawn a ni,” a ti bawk.
He thutkhawm ah hian Bank hotute chuan PMEGP Loan leh Loan dang an pek dan hrang hrangte report an pe a, harsatna chi hrang hrang sutkian dan turte an sawiho a ni. Mi 3087 hnenah PMEGP Loan hi an pe tawh a, kuminah hian Covid avangin an target pawh la approve chiah lo mahse; an sanction nual tawh thu Bank hotute chuan an sawi bawk.  He thutkhawm ah hian Board Vice Chairman, C.Ramhluna, Ex-MLA leh Commerce & Industry Director, J.Hmingthanmawia bakah Board Members-te leh Bank hrang hrang hotute an tel a ni.

Comments

Chhiar Hlawhte