COVID-19 hri kai nunna chan sing li chuang ta

India rama COVID-19 hri kai zinga nunna chan chu mi sing li an chuang ta. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample 6,64,949 enfiah leh niin heng atang hian hri kai 56,282 hmuh belh leh an ni a, heng te nen hian India rama hri kai hmuhchhuah chu 19,64,536 an tling tawh a ni. Darkar 24 kalta chhung khan mi 46,121 te chu dam-ah puan ni thungin tun thlenga enkawl dam chu 13,28,336 an tling tawh a, hei hi hri kai hmuhchhuah atanga chhutin zaa 67.61 an tling tawh a ni.

India ramah hri kai enkawl an pun zel laiin nunna chan pawh an awm ve zel a, darkar 24 kalta chhung khan nunna chan mi 904 awmin hri kai zingah nunna chan hi 40,699 an tling ta bawk a ni. ICMR chhin-chhiah danin tun thlengin India ramah Sample 2,21,49,351 enfiah ni tawhin heng atanga hri kai hmuhchhuah hi zaa 8.86 a tling bawk a ni.