December thla khian Mizoram-ah hri leng in a tawnsan lai ber a thlen rin a ni

COVID-19 hripui leng mek chu Mizoram-ah chuan December thla vel khi a nasat lai ber tur nia chhut a ni.

Inrinni kalta khan Health Minister, Dr. R. Lalthangliana chuan Civil Hospital, Lunglei tlawhin thawktute nen an inkawm a, he hunah hian Health Minister chuan hri leng mek chungchang sawiin, sawrkar laipui Health Ministry mithiamten Mizoram chu December thla ah kan peak tura an chhut thu leh a peak hunah case 5000 vel lai nei thei dinhmuna kan din thu a sawi a. Sawrkarin theihtawp chhuah mek zelin tun dinhmunah Truenat Quattro (Mini RT-PCR) khawl chu Mizoram District tinah thlen pui tawh niin bunfel tura hmalak mek a nih thu a sawi a. He khawl hmang hian COVID-19 mai bakah natna hrang hrang chi 16 test theih anih thu a sawi bawk. Health Minister chuan COVID-19 do kawngah Mizoram mipuite kan tang ho takzet tih pawh sawiin, H&FW leh Department hrang hrang thawktute, tlawmngai pawl te, Local Task Force, Kohhran hruaitute leh mipui thahnemngaihna leh thawhrimna ah lawmthu a sawi a. “COVID-19 hrileng mek hian engtik thleng nge a awh dawn a hriat loh a, kan hnaivai maia awm State leh ramdangah te a pung zel a, kan fimkhur lehzual a tul takzet a ni,” a ti bawk.

Health Minister hian NHM kaltlangin Lunglei-ah Doctor pahnih – ENT leh Radiation Oncology specialist-te lak thar an nih thu leh thawktu indaihlona phuhruk turin Department-in hma a lak zel thu sawiin, Health Department thawktute chu an mamawhte thlen vat thin turin a chah bawk.

Health Minister hian Lunglei Civil Hospital building bula building sak mek, Trauma Centre building tur chu enfiahin, hemi hnu hian Lunglei Civil Hospital TrueNAT Laboratory-ah khawl an dawn thar, Truenat Quattro bun tura hmalakna te enfiahin thawktute ruahmanna a siam pui bawk a. Lunglei Civil Hospital Truenat Lab ah hian Zirtawpni thleng khan sample 1386 enfiah ni tawhin Lunglei District-ah COVID-19 positive hmuhchhuah mi 108 an awm tawh a, an zinga mi 69 chu damdawi In atanga chhuahtir ni tawhin tun dinhmunah COVID-19 hri kai enkawllai 39 an awm mek a ni.